Prezidente Konsellu Diretora Rede Feto Timor-Leste Zelia Fernandes hetete, bareira lubuk ida ba feto sira ne'ebé atu kompete iha eleisaun suku nian mak laiha medida temporaria espeisal ruma, hodi fó dalan ba feto sira kandidata an iha kargu xefe suku.
Konsellu Diretória ne’e hatutan, sosiedade Timo-Leste nafatin metin ho sistema partriarkal ne'ebé hare katak mane mak dominante no feto sempre iha númeru segundu, entaun ida ne'e mak Rede Feto konsidera hanesan bareira ida ba feto atu kompete iha posizaun sira.
“Bareira seluk mak konsensia fámilia no sosiedade nian konabá kapasidade feto nian, dalabarak iha fámilia ka sosiedade konsidera feto ne'e ko'alia lahatene, ho ida ne'e sosiedade seidauk fó fiar ka tau fiar ba feto sira atu okupa iha kargu, pozisaun xave ka nudar foti desizaun,”dehan nia liu husi Programa TalkShow ne’ebé realiza iha Studio INDEPENDENTE, Hudi Laran Dili, kinta (13/07).
Tanba ne'e mak, husu ba organizasaun Rede Feto prezisa halo rekonsiliasaun ba sosiedade sira hodi hatudu feto nia prezensa nuudar lideransa.
Nia esplika, tanba mane sira ne'e sei labele reprezenta kestaun no nesesidade feto sira nian, tanba ne'e presiza fó mós oportunidade ba feto sira iha kargu xefia sira no lideransa suku.
Entretantu, Xefe Gabineti Diretór Jeral-CNE Virginia Mesquita da Costa hatete, Komisaun Nasional ba Eleisaun (CNE sigla Portugues) nafatin fó edukasau sivika ba iha feto potensial sira hodi bele kandidata iha eleisau suku iha tinan 2023-2024.
Tanba ne’e, CNE husu ba feto sira atu labele tauk atu hola parte iha vida polítika, no husu atu partisipa nafatin hodi bele hola parte iha pozisaun sira hotu.
