Tuir komunikandu ne'ebé Online INDEPENDENTE sita katak, iha loron 11 fulan-Jullu tinan 2023, GMPTL halo ona eleisaun ba membru foun meza GMPTL nian ba períodu 2023-2025 ho mandatu tinan rua ho balun iha VI lejislatura ne’e.
Entretantu, reuniaun ne’ebé hala’o iha sala GMPTL ne’e marka prezensa husi Deputada na’in 22 husi total Deputada 24 iha VI Lejizlatura nian.
Nune’e, Deputada na’in 22 refere, aprezenta lista kandidatura únika ba meza GMPTL mak hanesan, Deputada Aliança da Conceição Araújo ba Prezidente-GMPTL, Deputada Lucia Taeki Vise-Prezidente no Deputada Sancha Margarida Tilman Sekretaria.
Tan ne’e, liu husi votasaun ne'ebé iha estrutura meza GMPTL ne’e eleita ho votus a favor 14 , kontra 0 no abstensaun 8.
Hafoin eleisaun, Prezidente Sesante GMPTL, Deputada Lidia Norberta dos Santos Martins, entrega relatoriu atividade V Lejizlatura nian ba Prezidente GMPTL atual, no husu atu ekipa tomak inklui parseiru sira kontinua servisu hamutuk ba luta direitu feto nian.
Enkuantu, prosesu eleisaun refere hetan akompañamentu husi Sekretária Estadu Igualdade, Elvina Sousa de Carvalho, Xefe UN-Women iha Timor-Leste, Nishtha Satyam, Reprezentante Komisaun Funsaun Públika, Prezidente Rede Feto, Zelia Fernandes, Diretora Caucus, Terezinha Cardoso, Diretora Alola Fundasaun, Maria I. Guterres, Reprezentante Plan Internasionál, Laura Pina Lopes, Reprezentante International Republic Institution (IRI), Maria dos Reis no Diretora Fokupers, Maria Fatima P. Guterres.
