Nia dehan, objetivu husi audensia ne'e, JSMP hakarak kongratula direita Prezidente Parlamentu Nasional (PPN) foun, estrutura meza no estrutura bankada no komisaun sira.
Nia dehan, JSMP mós halo monotorizasaun ba iha Parlamentu Nasionál Tribunal Rekursu hodi fó asistensia legal ba vitima sira.
“Entaun, ami mai iha ne'e atu ko'alia ho Prezidente Parlamentu Nasional kona-bá deskobrementu sira ne'ebé Programa Monotorizasaun Sistema Judisial hetan durante iha lejislatura sira antes,” dehan nia hafoin remata hasoru malu ho PPN, iha Parlamentu Nasional, kinta (13/07).
Diretóra esplika, JSMP hato'o ba iha Distinta Deputada henesan Prezidente ne'ebé diriji PN no hato'o deskobrementu JSMP nian durante hala'o observasaun no sira nia rekomendasaun konabá progresu no dezafiu ne'ebé presiza hadia iha futuru.
“Dezafiu ida mak hanesan kestaun pontualidade, ne'e importante tebes, oinsa deputadus sira bainhira ba iha PN atu halo plenaria ka komisaun nian atu kumpri oras. Liuliu atu deskute konaba lei tenki prezensa husi deputadus sira hotu,”tenik Diretóra JSMP.
Nunee mós, JSMP hatoo ba iha PPN kona-bá lei sira ne'ebé produz sai mós kestaun tanba lian.
Tuir nia, Lei sira ne'ebé produs uza hotu lian português entaun ema barak la hatene, tanba ne'e presiza halo tradusan ba tetun atu nune'e publiku bele komprende.
“Tanba haré ba realidade ema barak mak seidauk hetene lian Português, maske ohin ne'e ita tenki aprende, los lian ne'e ita nian, oinsa lei sira ne'e persiza konsultasaun pùbliku liu tan maibé ho lian ne'ebé ema bele komprende, maske latradus hotu, maibé nia konteudu ne'e tradus ba tetun, atu nune'e bainhira halo konnsultsaun públiku ema hotu bele komprende,” nia esplika.
Ho nune’e, JSMP mós sujere ba iha PN kona-bá fiskalizasaun hato'o relatóriu ne'ebé lalais, atu nune'e karik ministériu balun hatama relatóriu mak mosu erru ruma bolu kedas ministériu ne'e mai hodi hatan, se lae reprezenta de'it, bele han tempu no lato'o nia objetivu.
Tanba ne'e, JSMP sujere ba PPN atu iha inisiu lejislatura ne'e bele konsidera sujestaun sira hodi kontinua mellora servisu deputadu sira nian iha futuru, liliu kona-bá prosesu diskusaun ba lejislasau sira.
