Médiku Jerál iha Sentru Saúde Likisa, Costancio Araujo dos Santos informa, iha Sentru Saúde Munisípiu Likisa to'o agora sei infrenta ba bee-moos.
Tuir nia, Bee-moos sempre infrenta iha sentru saúde Likisa no iha tempu udan iha bee, maibé tempu bai-loron naruk hanesan ne'e susar atu asesu bee-moos.
“Ami Sentru Saúde Munisipiu Likisa ho komunidade sira iha tempu bai-loron naruk sei infrenta ba bee-moos no ami uza orsamentu oitoan hodi sosa bee, atu ense ba haris fatin no sira seluk tan,”dehan Costancio, ba Jornalista INDEPENDENTE, iha Sentru Saúde Likisa, Segunda (06/11).
Nia afirma, orsamentu laiha, entaun kolega médiku sira uza osan privadu hodi sosa bee-moos tanki hodi ense ba hariis fatin no fase ekipamentu sira. Tanba osan estadu prevee ba atividade sira ne’e, maibé rezerva osan oitoan iha cash, atu bele tau hamutuk hodi sosa bee.
“Ha'u sente bee-moos importante tebes no ita ko’alia kona-ba prevensaun moras hotu-hotu bee-moos mak sai pilar importante, atu nune'e bele prevene pasiente sira mai konsulta hodi fase-liman,” Tenik nia.
Nia haktuir, tanbá ne'e pasiente sira fase-liman ne'e hodi prevensaun moras dengue no moras sira seluk tan, Médiku Jerál Sentru Saúde Likisa husu nono governu liu husi Ministériu Saude atu tau prioriedade ba bee-moos iha 2024.
“Ministériu Saúde tau prioriedade kanaliza bee-moos, tanba Sentru Saúde Likisa sai sentral ba komunidade sira no tenke presiza bee-moos,” nia relata.
