Prezidente KI, Otelio Ote hatete, prosesu aprezentasaun orsamentu KI nian hamosu debate ne’ebé manas uituan, tanba Primeiru Ministru, Kay Rala Xanana Gusmão konsistente atu kuidadu Orsamentu Estadu nian no husu tenke jera orsamentu povu nian ho di'ak.
“Primeiru Ministru halo apresiasaun no to'o ikus bele aprova ami nia orsamentu aumenta uituan husi envelope fiskál ne'ebé fó ba ami husi rihun $700 sa’e ba rihun $800," dehan Otelio Ote ba Jornalista sira iha Ministeriu Finansas, Aitarak Laran, (06/11).
Nia haktuir, KI tenke servisu makaas no tenke hatudu rejultadu ezekusaun ne’ebé di'ak liu iha 2024.
Bazeia ba planu no politika KI nian, iha programa rua (2) no sub-programa hitu (7) ne'ebé KI prepara ona atu implementa iha tinan oin. Programa dahuluk nian maka promove Liberdade Imprensa hodi asesu informasaun no programa daruak nian mak Boa-Govermasaun.
Nia dehan, tetu orsamentu husi envelope rihun $700 aumenta ba rihun $800 resin no ezekusaun orsamentu ne'ebé oras ne'e KI ezekuta foin atinje 21%, maibé KI katak ezekusaun ne’e sei aumenta.
