Prezidente Repúblika, Francisco Guterres Lú-Olo, hatete, dadauk ne’e konstrusaun ba monumentu Masakre Santa Kruz 12 Novembru 1991 ne’e hahu dadauk ona, nune'e fatin refere sei nakfilak ba fatin importante ne'ebe iha roteiru istóriku no turístiku iha Timor-Leste.
“Rate Santa Kruz ho monumentu espesiál ida ba erói no mártir sira sei nakfilak ba fatin importante ida iha roteiru istóriku, turístiku no edukativu ba ema hotu iha rai laran no vizitante sira husi rai-liur,” dehan Xefe Estadu, iha ambitu komemorasaun loron Masakre 12 Novembru, iha Santa Kruz, sesta ne’e (12/11).
Xefe Estadu afirma, masakre ne’e joven lubuk ida mak mate ka lakon no kanek inklui Kamal Bamadajah mós lakon vida. Hafoin, restaurasaun independénsia, estadu tulun inisiativa-sira buka hodi mártir sira ne’ebé lakon to’o ohin loron, maibé saudozu balun nia restu mortál la hetan.
Enkuantu, Xefe Estadu ho laran ksolok tebes haree projetu harii monumentu 12 Novembru, iha rate Santa Kruz hahú daudauk ona. Nune’e, hein katak monumentu ne’e sei prontu iha tinan ida nia laran (2022), ho kualidade diak, molok selebra 12 Novembru tinan 2022.
Asistente Editor: Saturnina da Costa
