Afonso Gomes hanesan aman husi Saudozu Sebastião Gomes, hatete, maski oferese nia oan mane mesak ba mate hodi liberta rai husi okupasaun Indonézia, maibé to’o agora la hetan apoia ruma husi Governu

“Ha’u seidauk simu apoia ruma husi Governu, loos duni momentu José Ramos Horta sei Prezidente Repúblika bolu ha’u no haruka karreta ba tula ha’u husi Vikeke mai Dili, maibé ami to’o iha nia fatin, Ramos Horta sai ba reuniaun, ne’ebé to’o agora seidauk iha apoia ruma mai ami família,” dehan nia iha ambitu komemorasaun loron Masakre 12 Novembru ba dala-30, iha Santa Kruz, Balide, sesta ne’e (12/11).

Enkuantu, ativista klandestina Saudozu Sebastião Gomes nudar oan mane mesak husi Afonso Gomes ho Rita Rangel, ne’ebé oho husi militár Indonézia bainhira atake ba Igreja Motael iha loron 28 outubru 1991.

“Ha’u sente triste ho ha’u-nia oan nia mate tanba nia hanesan osan-mean, kuandu nia lakon ha’u triste no tanis,”nia afirma ho mata-been.

Afonso Gomes ho ninia espoza Rita Rangel, dadaun ne’e hela iha aldeia Uma-Liurai, Suku Waimori, munisípiu Vikeke nudar agrikultór.

“Ha’u lakohi husu barak, maibé atu dehan katak ha’u-nia oan ne’e mate,ohin loron ema hotu ohin loron moris di’ak,”nia akresenta.

Nia hateten, ohin ne’e loron joventude loriku as’wa’in ne’ebé fó an ba mate hodi halo mundu hakfodak no fó solidaridade ba luta libertasaun ba independensia Timor-Leste.

“Foufoun ne’e akontese iha loron 28 outubru to’o mai 12 Novembru 1991, ha'u haree akontesimentu ne’e ha’u-nia laran kanek tanba ita interese de’it ida no ba 28 outubru ne’e ema la interese ona,” nia lamenta.

Iha Fatin hanesan Prezidente Komité 12 Novembru, Gregorio Saldanha, hateten, daudaun ne'e komité 12 Novembru liu-liu kolega sira ne’ebé uluk hamutuk ho Saudozu Sebastião halibur malu ona atu tulun saudozu nia inan-aman iha Vikeke.

“Komité 12 Novembru fó atensaun ba Saudozu Sebastião Gomes nia pai no mãe kleur ona ho apoia la’ós atu halo kedas uma ba saudozu nia inan-aman, maibé haree mak nia saúde,”dehan Grigorio.

Enkuantu, Prezidente Komité 12 Novembru ne'e husu ba Governu atu ajuda saudozu nia inan-aman ne’ebé kondisaun saúde la di’ak, Tanba ne’e, komité 12 Novembru sei organiza malu dala ida atu ajuda família ne’e.

“Ami esforsu nafatin tanba ne’e luta seidauk hotu, sente injustisa tanba balun seidauk hetan, espesialmente ba saudozu Sebastião Gomes nia inan-aman, nune’e ami kontinua hakilar hela de’it ba Governu atu ajuda,”tenik nia.

Asistente Editor: Saturnina da Costa