Enkuantu, husi traballadór na’in 175 ne’e kompostu husi mane na’in 103 no feto 92.

Sekretáriu Estadu Formasaun Profisionál no Emprego, Rogéro Araújo Mendonça husu ba traballadór sira bainhira ba halo servisu iha nasaun seluk, tenki kumpre regras no labele halai sai husi Sistema.

“kuidadu didiak labele ses husi sistema, tanba ita boot sira sai husi ne’e lori identidade TL nian, ohin imi tau sapeo ho faru RDTL nia, tan ne’e tau as dignidade nasaun ida ne'e nian iha nasaun seluk no tenki valoriza ita nia identidade,” dehan SEFOPE iha Ótel Timor Lodge Komoro, Sesta (18/08).

Sekretáriu Estadu dehan, Australia nasaun demokrasia, nasaun ida ne'ebé livre maibé iha mós nia limitadu, tan ne'e husu ba traballadór sira atu labele kontra regulamentu ne’ebé iha.

Nune’e mós, SEFOPE husu ba traballadór sira ne’ebé tuir organizasaun arte marsiais atu labele lori atributu sira ne’e ba iha ema nia naasaun, atu labele hamosu problema iha ema nia rain.

“Ba alin sira ne'ebé atu desloka ba Australia imi nia unidade mak tenki metin, karik balun susar tenki apoiu malu,” haktuir nia.

Iha fatin hanesan, Reprezentante Embaixadór Australia iha TL, Penny  fó parabens ba nasaun Timor-Leste tanba feto barak mak ba servisu ona iha Autralia, tanba Timor-Leste reprezenta iha persentaze ne'ebé boot iha programa Pasifik Australia Level Mobility Skil nian, iha nasaun sanolu (10) ne’ebé reprezenta feto barak liu. 

“Ami fiar katak ho programa mobilidade laboral ne'e bele  halo mudansa ba traballadór no familia sira liu husi orsamentu no koñesimentu sira ne'ebé hetan iha Australia, maibé imi tenki hare servisu mobilidade laboral ne'e liu-husi imi nia an, bainhira imi hare servisu ne'e hanesan imi nia an ne’ebé iha ligasaun ho imi nia nasaun,” katak nia.

Penny esplika, servisu mobilidade laboral ne’e importante tebes ba TL no Australia, tan ne’e husu ba traballadór sira atu aprende barak liu esperensia moris iha nasaun refere.

Ho nune’e, nia hatutan, Governu Australia iha komitmentu boot atu hasa'e númeru traballadór TL ba servisu iha Australia.

“Ba trabalhador sira, komesa agora hanoin ona katak saida mak ita boot sira halo bainhira servisu remata hodi fila mai TL, ha’u sei hare ba oin, atu hare saida mak ita boot sira sei halo ba rai no ba povu TL bainhira remata servisu iha nasaun seluk,” nia hatoo.

Entretantu, iha biban ne’e, Traballadór Dulce Fernandes Lopes senti kontente ho oportunidade ne’ebé nia hetan.

Tuir nia, bainhira remata nia servisu, bele hadia ona ekonomia uma laran no mós ekonomia sosiedade nian.

Enkuantu, tuir mehi Dulce nian, bainhira remata servisu iha Australia fila mai Timor sei loke negosiu ida hodi bele  hadi’a diak liu ekonomia sosiedade no nasaun.