Apoiu sosiál ne’e mak hanesan fós nutritivu ne’ebé Prezidénsia Repúblika hetan husi ajudu hosi grupu empreza nasaun Malázia ne'ebe apoiu programa Xefe Estadu Ramos-Horta hodi kombate mal-nutrisaun ba labarik sira iha Timor Leste.‘
“Prezidénsia Repúblika kontinua distribui fós nutritivu ba grupu alvu sira nune’e, ohin, ita mai iha konventu Sta. Terezinha do Menino Jesus iha Maubara no iha Irmã ISMAIK Loes, Munisipiu Likísa, hafoin kontinua ba Tunu-Bibi, Irmã Franciscana Hospitaleira, Madre SSPS iha Akar-Laran no mós Madre sira husi kogregasaun Reparasaun Nossa Senhora de Fátima iha Memo Bobonaro, ne’ebé iha kna’ar bo’ot liu hodi ajuda mós ba ita-nia komunidade ne’ebé moris ho kondisaun mínimu no ho mal-nutrisaun ne’ebé aas,’’ dehan Xefe Casa Civil Jesuína Gomes, iha komunikadu ne’ebé Online INDEPENDENTE sita, sesta (18/08).
Xefe Casa Civíl ne’e relata, ba kada konventu oferese fós nutritivu ho totál sakas 60 no tuir planu sei kontinua distribui mós ba grupu alvu sira ne’ebé halo ona identifikasaun iha territóriu nasionál liuliu iha órfanatu sira.
‘’Ami agradese tebes ba Maromak liuhosi Prezidente Repúblika José Ramos-Horta ne’ebé haraik ona mai ami, fós nutritivu ida ne’e hodi ajuda ami-nia alin sira,’’ espresa Me. Ermelinda de Jesus iha Maubara.
Irmã Imaculada Ximenes husi Sentru ISMAIK hato’o agradesimentu ba Xefe Estadu Horta nia tulun ba órfanatu sira tuir misaun ISMAIK nian ho objetivu atu prepera labarik sira ba futuru kreda no nasaun.
Reprezenta mós konventu sira iha Memo no Akar-Laran, Madre Apolónia Fátima Ramos Martins husi konventu Franciscana de Hospitalidade Tunu-Bibi, sente orgullu ba ajudu sira ne’ebé hetan husi Prezidénsia Repúblika.
“Konsidera, hanesan grasa bo’ot ida ne’ebé Maromak haraik mai ami liu hosi prezensa Prezidénsia Repúlika,’’ katak Me. Apolónia.
Tuir dadus, Konventu Maubara iha totál orfanatu hamutuk 21, Loes iha 100-resin, Tunu-Bibi iha na’in 31, Akar-Laran iha 15, Memo iha família kuaze 100-resin, ne’ebé maioria moris hosi família vulnerável no inan-aman ne’ebé mate ona.
Antes ne’e, Xefe Casa Civíl, Jesuína Gomes inisia ona distribuisaun fós nutritivu iha Munisípiu Likísa, Postu-Administrativu Bazartete iha loron 16 Agostu ne’e, ba Pre-Eskolár Bermeta Haburas ne’ebé funda hosi veterana Madalena Bidau Soares "Kasian’’ ho fós hamutuk 50.
