Enkuantu, programa ne’e, hetan apoia husi grupu emprezariál Malázia ho totál fós saku 2.500.
“Ha’u lori apoiu oituan ho saku 50. Fós ne’e ba labarik sira, atu tulun labarik sira-nia pezu no dezenvolve labarik sira-nia fíziku no kapasidade kakutak nian’’ hateten Xefe Casa Civil, Jesuína Gomes, iha Komunikadu ne’ebé Online INDEPENDENTE sita.
Xefe Casa Civil informa, distribuisaun fós iha eskola ne’e hanesan dahuluk no sei kontinua mós ba eskola sira ne’ebé halo ona identifikasaun iha territóriu nasionál.
Xefe Estadu José Ramos-Horta iha nia mandatu tau prioriedade aas tebes ba kombate má-nutrisaun ne’ebé tuir dadus, iha 47% labarik iha Timor-Leste mak afetadu.
Aleinde ne’e, iha mós programa atu hadi’ák liutan atendimentu ba inan-isin rua no susuben inan-nian ba labarik sira.
Tuir planu, Prezidénsia Repúblika iha semana ne’e, sei kontinua distribui ba Orfanato iha Maubara, Loes no Maliana.
Hatan ba asaun Prezidénsia Repúblika nian ne'e, Fundadora Pre-eskolár Bermeta, Madalena Bidau Soares "Kasian’’, nu’udár veterana ida, agradese apoiu ne'ebé nia estudante hamutuk ema na’in-97 ne'e simu.
“Ha’u loke eskola iha ne’e, atu lori istória funu sai ba ne’ebé de’it, tanba ne’e, ha’u haksolok ba apoiu, hodi hatudu katak Prezidente Repúblika hatene direta katak ki’ikoan sira iha ne’e la’ós tuur de’it maibé buka matenek’’, dehan veterana Madalena "kasian".
Aleinde apoiu fós, Prezidénsia Repúblika hahú iha Maiu 2022, ajuda mós eskola sira ho dalan oioin no fó apoiu sosiál ba sidadaun vulnerável sira hamutuk 1000-resin.
