Iha dekretu Prezidente Repúblika nú.74/2023 hodi atribui kondekorasaun ne’e, Xefe Estadu konsidera Luís Cardoso, “desempeña atividade sira ho importánsia aas ba kauza autodeterminasaun no independénsia Timor-Leste, liu husi knaar sira ne’ebé nia hala’o nu’udar reprezentante Konsellu Nasionál Rezisténsia Maubere (CNRM), iha Portugal, hodi servisu hamutuk ho reprezentante espesiál CNRM no Laureadu Nobel ba Pás, José Ramos-Horta”.
Alende ne’e, nia mós hola parte iha delegasaun Rezisténsia Timoroan ne’ebé hasoru malu ho antigu Prezidente Áfrika-du-Sul, Nelson Mandela, iha Lizboa, Portugal.
"Takas halo ami orgullu no hariku literatura timoroan. Ami hotu orgullu bainhira lé livru sira husi hakerek-na’in Takas ne’ebe tradús ba lian oioin, iha nasaun barak no sujeitu ba krítika literaria iha jornal sira internasional", afirma Xefe Estadu ne'ebé rekoñese Luís Cardoso la'os de'it hanesan mestre-boot literatura Timor nian, maibé mós ba lian seluk husi nasaun barak.
Prezidente Repúblika fó hanoin, dalan ida ne'ebé Prezidénsia Repúblika no instituisaun Estadu no privada sira bele halo hodi insentiva ábitu lé iha Timor-Leste mak fó koñese autór sira husi área ida ne'e, ba joven no ba potensia lé-na'in sira.
"Premiu literáriu, buat ne’ebé akontese ba hakerek-na’in ida nia moris, bainhira fiar iha valor no kualidade husi nia traballu. Kondekorasaun, buat ne’ebe Estadu fó ba nia sidadaun ida ba servisu sira relevante. Ha’u la halo traballu relevante ida ba ha’u-nia rain durante tinan-20 liuba, maibé presta de’it ha’u-nia kontribuisaun ba ezisténsia literatura timoroan nian", subliña Luís Cardoso "Takas" iha nia diskursu, hafoin simu tiha kondekorasaun husi Xefe Estadu.
Nia fiar katak "sedu ka tarde ita sei iha hakerek-na’in estraordionáriu iha Timor-Leste".
Tuir Dekretu-Lei númeru 20/2009, Orden Timor Leste nu’udar rekoñesimentu husi Estadu ba sidadaun nasionál ka ema estrajeiru, ne’ebé mak liuhusi sira-nia atividade profisionál, sosiál ka asaun espontánea nakonu ho korajen, fó kontribuisaun boot ba Timor-Leste, ba timoroan ka ba umanidade.
Luís Cardoso hakerek-na’in timoroan rekoñesidu internasionalmente no manan-na’in “Prémiu Oseanu”, ida husi prémiu literáriu respeitaduliu iha mundu luzófonu, hakerek ona livru hitu, inklui novella, kontu, no ensaiu ne’ebé tradús ba lian oioin. Iha nia obra sira, dala barak esplora tema sira hanesan funu, eziliu no luta ba independénsia.
Entretantu, Luís Cardoso oan husi enfermeiru ida ne’ebé hala’o knaar iha fatin barak iha Timor-Leste, moris iha Cailaco, Bobonaro, iha 1958. Nia estuda iha Koléjiu misionáriu Soibada no Fuiloro no tuir mai, iha Semináriu Dare no Liseu Dr. Francisco Machado, Díli. Nia hela iha Timor-Leste to’o de’it tinan-18, hafoin muda ba hela iha Portugal no remata kursu lisensiatura iha silvikultura, iha Institutu Superior Agronomia Lizboa.
