Administradór no Prezidente Autoridade ne’ebé sei simu pose mak Olivio Freitas nu’udar Prezidente Autoridade Munisipiu Baukau, Domingos Savio nu’udar Administradór Munisipiu Lautem, no Januario Soares sai Administradór Munisipiu Vikeke.
Ministru Miguel informa, pose ba kandidatu na’in tolu ne’e sei hahú uluk ho Administradór Munisipiu Lautem iha 11 Janeiru 2020, iha loron 12 Janeiru sei kontinua ho pose ba Prezidente Autoridade Munisipiu Baukau, no iha 14 Janeiru sei fó pose ba Administradór Munisipiu Vikeke.
“Semana oin sei halo tomada de pose ba Administrador no Prezidente Autoridade ba munisipiu tolu ne’e,” informa, Miguel iha iha Palasiu Governu, Kuarta (06/01).
Lista Kandidatu Administrador Aileu, Ainaro, Kovalima iha Ona KM
Ministru Administrasaun Estatal, Miguel Pereira de Carvalho informa, prosesu rekrutamentu ba administrador munisipiu Aileu, Ainaro no Kovalima konklui ona no iha 5 Janeiru submete ona ba Konsellu Ministru (KM).
“Konsellu Ministru sei marka ajenda hodi deskuti no aprova kandidatu sira ne’ebe ha’u propoin mai iha Konsellu Ministru atu sai administradór,” dehan nia.
Ba naran kandidatu munisipiu tolu ne’ebé haruka ona ba KM mak: Abel da Conceição , Agosto Manuel de Oliveira Carvalho, no João Fernando Martins Borges, husi Munisipiu Aileu.
Kandidatu husi Munisipiu Kovalima mak Afonco Nogueira Nahak, Albino Carvalho Lelo, Damião Amaral, no Francisco de Andrade.
Kandidatu husi Munisipiu Ainaro mak Aguida Judit Mendonça, Eduardo Lopes de Carvalho, Leovizildo Amaral Pereira, no Lourenço Barros Magno.
Rekruta Tan Kandidatu Administradór Munisipiu 5
Entretantu, Ministériu Administrasaun Estatal (MAE) kontinua halo rekrutamentu ba administrador munisipiu Bobonaro, Likisa, Maliana, Dili, Ermera, no Manatuto.
“Agora iha fulan ida ne’e nia laran ita sei taka sai lista kandidatu sira ne’ebé atu tuir ezame no ezame sei halo iha prinsipiu fulan Fevereiru,” informa Ministru Miguel.
Ho rekrutamentu ba munisipiu lima ne’e, hela Munisipiu Manufahi mak seidauk no sei hein prosesu tuir mai.
