Uma-kain hirak ne’ebé hetan estragus husi dezastre naturais mai husi Munisipiu 11 no RAEOA, la inklui Dili no Ainaro.
Xefe Gabinete Relasaun Externa no Komunikasaun, Anacleto Caitano hatete, durante semana ida, APS rejistu dezastre naturais iha tipu rua hanesan anin-bo'ot no ahi han-uma.
“Uma ne'ebé hetan estragus hanesan, iha munisipiu Aileu, anin sobu uma ida, Atauru anin sobu uma ida, Baukau anin sobu uma 20, Bobonaro anin sobu uma rua, Covalima anin sobu uma ida, Ermera anin sobu uma ida, Lautem anin sobu uma tolu, Likisa anin sobu uma neen, Manatuto ahi han uma ida, Manufahi ahi han uma ida, RAEOA anin sobu uma tolu, Vikeke ahi han uma haat," dehan nia iha Xefe liu husi konferensia imprensa, iha Salaun Konferensia, APS, Kaikoli, segunda ne’e, (16/10).
Nia hatutan, ba vitima afeitadu sira, ekipa APS husi munisipiu fó ona apoiu emerjensia hanesan aihan no la’ós aihan.
Nune'e mós APS munisipiu kontinua halo levantementu ba vitima sira nia sasan ne’ebé lakon no estragus husi dezastre naturais.
Entretantu, tuir dadus ne’ebé APS rejista hahú husi fulan-Janeiru to’o Outubru tinan ne’e, komunidade nia uma ne’ebé hetan estragus husi dezastre naturais hamutuk 2.512.
Husi númeru ne’e, vitima hamutuk na’in 1.150 mak tama iha kategoria apoiu rekuperasaun no APS fó ona apoiu.
