Tanba tuir Koordenadór eskola sira katak, estudante hirak ne’e la priense kriteriu ne’ebé eskola sira aplika.
Kordenadór Ezame Nasionál iha ESJ Finantil Aniceto Berlelo Gouveia hatete, lista estudante ne'ebé hetan ona númeru ezame nasionál hamutuk 720 ne'ebé kompostu husi mane na’in 443 no feto 277.
Husi númeru ne'e, iha estudante na’in 88 mak la tuir ezame nasional, ne’ebé kompostu husi mane na’in 59 no feto 29.
Kordenadór ne’e hatutan, estudante hirak naran iha lista ne'ebé haruka hotu ona ba Ministériu Edukasaun (ME) no sira nia númeru ezame mós iha, maibé estudante hirak ne'e la prense kriteria edukasaun nian tanba ne'e sira labele tuir ezame iha tinan ida ne'e (2023).
"Estudante sira ne'ebé latuir ezame ne'e tanba sira la prense kriteria eskola nia hanesan, la ativu iha aula, persentajen absensi la to'o 60% no balun la tuir ezame iha periodu segundu nian no balun rezigna an,no balun dokomentus mak lalos"dehan nia ba Jornalista Online INDEPENDENTE, iha Knar Fatin, ESG Finantil, Aimutin, Segunda ne’e (16/10).
Ba estudante ne’ebé la tuir ezame nasional, Koordenadór ne’e afirma, parte eskola labele foti ba desizaun ba estudante sira ne'ebé la turi ezame nasionál, bainhira sira hakarak tuir fila fali ezame nasionál, maibé hein autorizasaun husi Ministeriu Edukasaun.
Enkuantu, nia dehan, estudante ne'ebé prense kriteria hodi tuir ezame nasionál hamutuk 632, kompostu husi mane na’in 384 no feto 248.
Iha sorin seluk, Diretór Eskola Bazika Central 30 de Agusto Komoro, Vitorino da Silva Marquês Uai-Ria mós afirma katak, iha EBC 30 de Agustos mós iha estudante na'in hitu (7) mak la tuir ezame nasionál iha loron dahuluk.
Diretór dehan, estudante hirak ne'ebé la tuir ezame iha loron dahuluk ne'e, laiha kuiñesimentu husi diretór eskola sira tanba familia no estudante ne’e rasik la informa razaun la tuir ezame nasional iha loron dahuluk.
Tuir nia, estudante hirak ne’e latuir ezame nasional iha loron dahuluk, durante ne’e ativu iha eskola.
Entretantu, tuir observasaun Jornalista Online INDEPENDENTE iha terenu nota katak, iha loron dahuluk realizasun ezame nasional iha eskola sira iha Kapital Dili, la’o diak.
Enkuantu, tuir orariu ne’ebé Ministeriu Edukasaun fó sai, ezame nasional hahú iha loron 16 to’o 18 no ezame lokal hahú iha 19-20 fulan-Outubru 2023.
