“Ne’e hanesan ita tama iha kampu batalla ida, la’ós funu hasoru inimigu, maibe funu hasoru ita nia aan rasik, loron ida ne’e atu hasa’e ita nia kapasidade fé, takwa no ohin loron sai hanesan vitória ida,” dehan nia ba jornalista sira iha Masjid An’nur, Kampo Alor, Díli, kuarta ne’e (10/04/24).
Prezidente fundasaun ne’e hatutan, hanesan komunidade Musulmanu iha Timor-Leste ne’ebé minoria kontenti no haksolok tanba la hetan diskriminasaun husi komunidade relijiaun seluk.
“Ita haree komunidade musulmanu iha teritóriu nasionál mós hala’o moris hamutuk ho komunidade relijiaun seluk la’o ho di’ak , amizade, armonia no laiha diferensia buat ida, laiha konflitu relijioju. Ida ne’e ita konsidera hanesan vitória ida ne’ebe di’ak ne’eb’e ita Timoroan alkansa no sai lisaun boot ba mundu,” tenik nia.
Iha selebrasaun Idul Fitri ne’e, tenke iha mudansa iha ida-idak nia an rasik, ba fé, signifika katak hamta’uk de’it Nai Maromak no besik bá Nai Maromak.
Iha sorin seluk, Prezidente Repúblika José Ramos Horta mós lori povu Timor-leste nia naran hato’o votus ba ksolok Idul Fitri nian.
“Maun-alin no inan-feton Musulmanu sira iha Timor-Leste, hodi Povu Timor-Leste nia naran, ha'u hato'o ha'u-nia votus ba imi hotu iha okaziaun ksolok Idul Fitri nian, ne'ebé marka ikus husi fulan santo Ramadan nian,” nia hateten liu husi komunikadu ne'ebe Online INDEPENDENTE sita..
Tuir Xefe Estadu, Idul Fitri mak selebrasaun viajen espirituál nian, momentu idą atu haksolok ho família no belun sira, hodi fó perdua ba sala sira iha tempu uluk, no renova lasu unidade, pás, no laran-sadi'a iha fuan Islam nian.
“Iha Timor-Leste, ita orgullu ho ita-nia diversidade relijioza no armonia. Komunidade Musulmanu nu'udar parte integradu husi kultura sira ne'ebé halo ita-nia nasaun hanoin klean ho hanoin sira ne'ebé ita tau aas nu'udar nasaun. Bainhira imi marka ona okaziaun nakonu ho bensaun ida ne’e ho orasaun, reuniaun no festividade sira espesiál , ha'u dezeju katak ida-ne'e sei lori ksolok, pás no bénsaun ba imi no ema ne’ebé imi hadomi,” haktuir Xefe Estadu.
Entretantu, Sekret’ariu Jeral FRETILIN Marii Bin Amude Alkatiri mós hato’o votus no domin ba musulmanu tomak iha Timor-Leste.
“Ha’u tatoli votus no domin ba musulmanus tomak iha Timor- Leste no iha mundo no solidariedade ba sira hotu atu bele ita ida-idak kore ita nia an husi sala no perdua malu. Eid Mubarak,”
Nia akresenta, Idul-fitri loron bot ida nebe'e depois akontese depois fulan ida hala'o jejun-fulan Ramadan. Idulfitri tinan ida ne'e akontese semana ida depois Semana Santa no Páscoa Cristão Católico sira nian.
“Mai ita hotu hamutuk atu komemora Páscoa no Idulfitri no hamulak hamutuk ba Allah, Maromak Santo atu fo Paz ba ita hotu, fraternidade ba ema moris hotu-hotu iha mundo rai klaran.
Festa Kmanek ba ita hotu,”nia hakotu.
