Sekretariu Estadu Ensinu Sekundariu Jeral no Téknika Vokasionál, Domingo Lemos Lopes hatete, formasaun ne'e hanesan oportunidade di'ak ne'ebé presiza fahe informasaun no esperiénsia no matéria sira kona-ba programa inspesaun nian liliu ba lisensiamentu ne'ebé importante tebes.
Formatu Vistória Dijital hanesan formatu ka padraun ida atu inspetor sira la'o tuir hodi halo inspesaun ba pre-eskolar sira ho nia tema “Sosializasaun no introdusaun prosedimentu padraun lisensiamentu no formatu vistória dijital no estimulante ba labarik”.
"Durante loron rua, husu ba ita-boot sira atu fó atensaun tanba iha nia tema sentrál ne'ebé ita foti mak sosializasaun no intrudusaun prosedimentu padraun lisensiamentu no firma vistória dijital no estimulante ba labarik," dehan Sekretáriu Estadu iha Salaun Tower Fatuhada, Kinta (11/04).
Governante afirma, banhira atu loke eskola nia klase paralelu presiza iha informasaun sira ba iha diresaun munisípiu no nasionál hodi ekipa tun ba terenu atu haree didi’ak nia situasaun atu nune'e garante katak balo servisu ruma tenki to’o nia rohan.
"Signifika katak bainhira iha munisípiu ida ita loke eskola balun nia klase paralelu nune’e ita presiza iha informasaun sira mai iha Diresaun Munisípiu no nasionál hodi ekipa tun ba baze hodi hare didi’ak ninia situasaun sira atu nune'e ita garante katak bainhira halo servisu ruma karik tenki to'o rohan," dehan Sekretariu Estadu Domingos iha Salau Tower Fatuhada, Kinta (11/04).
Nia parte husu ba inspetór sira tenki halo supervizaun no monitorizasaun hodi bele haree padraun saída mak bele aplika, atu nune'e exersísiu ne'ebé gasta enerjia tomak maibé nia benifisiu la di'ak ba estudante no komunidade tenki fó hanoin ba sira komunidade sira banhira atu loke eskola ruma.
Nia dehan, involvementu inspetor, Diretór Servsiu Edukasaun Munisipiu no Superintendente iha Ministériu Edukasaun nia papél ne’e importente liu, tan ne’e presiza intende didi’ak padraun saída mak bele uza hodi habelar ba iha komunidade sira iha baze.
"Tanba nee tenki fo infomasaun sensibiliza ba komunidade sira iha baze, tan bainhira atu halo buat ruma nee la fasil, se dehan fasil hotu mak ikus mai prejudika hotu nia prosesu. Tanba nee mak ita oresiza foti dadus didiak, levantamentu dadus nee importante hare ba jeografilamente fatin ne'ebé presiza ita boot sira lori mai ita halo diskusaun se posibilidade bele ita kontinua se labele tenki hapara," katak nia.
Nia hatuta, Formasaun ne’e ba Diretor Munispiu Inspetor no Superintendente husi Pre-Eskolar ho razaun tanba padaraun mínimu ne'ebé presiza atu haree mak pre-eskolar.
Iha fatin hanesan, Inspetora Pre-Eskolar Munisípiu Vikeke, Angelina da Costa hatete, sira-nia prezensa iha formasaun ne'e oinsá atu hatene kle'an kona-bá formatu vistória nune'e bele halo desizaun ruma iha terrenu durante inspesaun.
"Ami nia prezensa iha ne'e atu tuir formasaun kona-bá formatu istória nia, ami mós hakarak hatene loloos no klean liu tan saida mak vistoria tanba buat ida vistoria ne'e foin primeira vez ami tuir, entaun ami mós hakarak hatene loloos saida mak vistoria ne'e," dehan nia.
Tanba iha formatu vistoria ne'e hanesan padraun minimu ida ba eskola sira, eskola sira ne'e bele kontinua ka lae konforme sira tun ba baze halo inspesaun lai foin hatene katak eskola ne'e bele kontinua ka lae.
Iha biban ne'e, Superintendente Pre-eskolar Munisipiu Ermera, Domingos Babo, hatete, formasaun nee importante tebes tanba kuandu iha Timór ne'e, dala ruma loke eskola la haree ba rekursu humano no infrastrutura maibé loke tuir sira hakarak de’it.
"Formasaun nee importante tebes tanba iha Timor dala ruma loke eskola ita haree sira hanesan ba halo toos, tanba rekursu umanu no infraestrutura seidauk prepara no sira loke tuir gostu de'it tanba ne'e, informasaun ne'ebé ami hetan ne'e hanesan matadalan ida neʼebé ita bele ba esplika ba komunidade iha munisipiu to'o postu sira.Nune'e sira mós bele iha ona koñesimentu kona-ba oinsá atu bele loke ka harii eskola ida," katak nia.
Nia akresenta, liu husi formasaun nee iha Espernsa katak ba oin eskola neʼebé uluk ema loke no balun la prense kritériu liuhosi manuál ka regulamentu ne'ebé iha, bele minimiza ona ka bele taka ona.