Prezidente Autoridade Munisípiu Dili (PAMD), Guilhermina Filomena Saldanha Soares hatene, iha ámbitu komemorasaun independensia kondekorasaun medalla ba veteranu na'in 50 ho órden funu na'in no órden Nicolau Lobato.

"Nivel nasionál hala'o iha Munisípiu Manatutu, maibé munisípiu sira seluk mós, entaun Dili mós iha ambitu komemorasaun independensia nian ita halo iha ne'e konsentrasaun medalla ba ita-nia veteranu sira na'in 50," dehan nia, iha Edifisiu Autoridade Munisípiu Dili, Matadoru, horisehik.

Tuir nia, sira ne'ebé kondekora la marka prezensa ne'e, depois husi konsellu veteranu munisípal ka nasionál mak atu haree atribui fali sira-nia kompetensia.

"Buat hotu-hotu kona-ba ita-nia maun veteranu no veterana sira ne'e kompetensia buat hotu-hotu ne'e ita-nia konsellu veteranu munisípal no nasionál mak hatene, ami provelensia de'it fatin atu sira bele mai," tenik nia.

Guilhermina afirma, hirak ne'ebé kondekora ne'e maioria Munisípiu Dili husi Postu Ataúru, tanba mezmu hamriik ketak ona maibé tanba sira seidauk iha konsellu veteranu entaun mai hamutuk ho Dili, sira na’in 10.

Agora, númeru ne'e balun la marka prezensa. Tanba ne'e, husi konsellu veteranu mak hatene bolu kondekora sira nian fatin ka iha ne'ebé ne'e depende ba sira, maibé númeru ne'ebé lei sai ona mak 50 ne'e.

Iha fatin hanesan, Kondekoradu Marcos Amaral ‘Terus’, husi Postu Administrativu Metinaro, agradese ba Governu bele rekoñese ona ninia luta hanesan funu na'in hodi hetan ona medalla Kondekorasaun.

"Ha'u ho orgullu boot tanba durante tinan naruk, agradese tanba Governu bele rekoñese ami sai hanesan Kombatente Libertasaun Nasionál ne'ebé Governu mós fó valor ba ami," nia salienta.

Nia hatutan, hanesan luta na’in ida durante tempu funu naruk iha situasaun ne'ebé ke defisil mais nafatin halo esforsu tomak hodi kontinua luta ba oin, to'o ohin loron Governu bele rekoinese netik hanesan funu na'in ida ka luta na'in ida.

"Haree husi dedikasaun ne'ebé mak Governu deside ona ba ami bainhira de'it ami prontu atu bele asesu ba iha ami nia direitu ne'ebé mak Governu prepara ba ami," nia akresenta.

Nia hatutan, ninia involvimentu iha baze apoiu durante tinan 3 fulan 10 iha ai-laran hahu husi tinan 1975 ne'e iha ona ai-laran.

"Momentu ha'u sai ba ai-laran ha'u sei Segunda klase tun fali mai iha 1979 no kontinua fali klandestina iha 1986 to'o mai 1999, tanba ne'e ha'u hetan medailla orden kolar Nicolao Lobato," tenik nia.