“Iha Munisipíu Lautém área ne’ebé mak luan, parke Nasionál ne’ebé maka importante, iha Nonu Governu ida ne’e maka ita dezenvolve ho diak, sei atrai ita nia turistiku sira bele mai vizita,”dehan nia hafoin hala’o vizita ba Parke Nasional Nino Konisa Santana, Mehara, (07/08).

Governante ne’e hatutan, durante iha deklarasaun Parke Nasionál tinan 15 Governu seidauk kria kondisaun ruma ne’ebé maka iha, tanba ne’e maka ho vizita primeiru atu hare’e asuntu sira hanesan ne’e, atu prepara hodi kria kondisaun ruma ba iha Parke Nasionál Nino Konis Santana nian.

Ho nune’e, planu ba governu dasia nian liliu Sekretáriu Estadu Florestas iha programa 14 ne’ebé mak hetan ona aprovasaun iha parlamentu Nasionál durante tinan lima nian.

“Programa ida iha munisipíu Lautém mak oinsa bele dezenvolve parke Nasionál Nino Konis Santana ne’ebé estabelese iha munisipíu Lautém, hare’e katak área ne’ebé luan tebe-tebes ita hakarak atu oinsa mós ita bele involve ita nia autoridade lokál sira, komunidade sira hodi bele suporta no tau hanoin hamutuk ba oin bele dezenvolve diak liu tan parke nasionál hodi bele atrai ita nia turistika sira aban bai rua bele mai vizita”, tenik Sekretáriu Estadu.

Governante ne’e akresenta, atu dezenvolve parke nasional la’ós deit iha munisipíu Lautém, iha mós Parke Nasionál Kay Rala Xanana Gusmão iha Munisipíu Manufahi, Parke Nasionál sira ne’e Governu sei dezenvolve ho diak.

Iha mós Jardin botaniku Francisco Xavier do Amaral, ne’ebé lokaliza iha munisipíu Aileu, Postu Administrativu Remexio, programa sira ne’e SEF sei hare no sei dezenvolve, bazea ba orsanmentu ne’ebé governu sei aprova.

“Ita mos iha área protezida 46 ne’ebé hanesan ita deklara ona, ita halo mapamentu, ita halo ona destaka definitivu de markasaun, ida ne’e ita sei dezenvolve diak liu tan atu bele fó sustentabilidade ba ita nia área floresta ne’ebé ita define ona,”hatuir SEF.

Iha fatin hanesan Administradór Munisipíu Lautém Domingos Savio, apresia ho Sekretáriu Estadu Floresta nia prezensa, hanesan Lautém oan, uluk eskola hamutuk iha tinan barak la hasoru malu, agora hasoru malu liu husi servisu ida ne’ebé Governu fó fiar.

“Normalmente governu sentral mai munisipíu Lautém sempre mai halo inkontru oan ida ho administrador munisipíu nune’e bele halo kordenasaun servisu ida iha munisipíu, ita iha ministeriu diresaun hotu-hotu iha relasaun servisu integradu, politikamente ami apoiu setor Florestal para ami sosialija ami nia komunidade sira kuidadu amibiente labele estraga animal fuik, ita nia ai-horis sira, para fo mahon ba ita sai ita nia munisipíu nia kurasaun Timor nia furak, bele fornese mos bee mai ita” dehan Adminitrador munisipíu Lautém

“Kuandu ita proteze didiak, benefisiu ekonomiku iha ita nia munisipíu Lautém, liga ho área turistiku kuandu floresta diak,”nia dehan.

Nia dehan Munisipíu Lautém koñesidu ho área turistiku ne’ebé iha kategoria tolu hanesan,  turizmu historiku, relijiozu, turizmu ba kultural, ida ne’e mak hala’o dadauk no identifika ona fatin sira, nune’e halo planu hodi tau iha programa atu bele dezenvolve diak liu tan.