“Ami mai vizita fatin ida ne’e atu hare, ita nia prepasaun bee posu ne’ebé mak hanesan prepara iha fatin ida ne’e, hodi fornese ba ita nia rusa ne’ebé agora ita estaka no halo manutensaun iha ne’e no espera katak tempu tuir labele hetan tan rusa mate tan bee la iha,” dehan Sekretariu Estadu Floresta, Fernandino Vieira da Costa, iha Jaco, segunda (07/08/23).

Governante hatutan, mudansa klimatika ne’e sei afeta ba mundu, tan ne’e governu tenki antisipa.

Tuir nia, hanesan governante tenki hanoin antes hodi halo protesaun atu asegura rusa sira ne’ebé moris iha Illa Jaco.

Nia dehan, udan been ne’ebé dadaun ne’e prepara hela hamutuk tanke neen (6) iha fatin refere, ho nune’e, tan ne’e bee ne’ebé prepara ona iha fatin refere hamutuk 50 mililitru.

“Ha’u hanoin ne’e sufisiente ona, espera katak loron hira tuir mai to’o iha fulan-Setembru no Outurbro, bee bele sufisiente hodi fornese ba ita nia rusa sira ne’ebé moris iha fatin ida ne’e,” Nia hato’o.

Sekretariu dehan, karik bee la to’o diresaun sei iha responsabilidade hamutuk ho autoriedade lokal no ekipa tekniku sira ne’ebé destaka iha fatin refere bele hare ida ne’e.

Ba peskador sira, SEF dehan, sira mak hanesan na’in ba fatin refere, sira mós iha dever obrigatoriu atu fó informasaun ba governu atu bele halo atusaun karik mosu mudansa klimatika.

Entretantu, Sekretariu Estadu ne’e mós hatete, sei orienta ekipa destaka sira atu hasai bidon aat sira ne’ebé iha, atu nune’e labele fó impaktu ba animal sira seluk ne’ebé moris iha fatin refere.

Enkuantu, hahan ba animal sira, Sekretariu Estadu hateten, ai-han ba animal sira sufisiente ona tanba animal sira iha fatin refere familiar ona ho ai-horis sira.