Vise-Primeiru Ministru no Ministru Kordenador Asuntu Dezenvolvimentu Rural (VPM-MKDR) Mariano Assanami Sabino hatete, Timor-Leste ukun an tinan 20 liu ona, tan ne’e tempu ona atu kria Ministeriu Dezenvovimentu Rural hodi bele hadi’a nesesidade baziku husi baze.
“Malázia hanesan modelu dezenvolvimentu rural kleur ona, entaun sira iha esperensia barak tan ne’e sira mai fahe esperensia ba Governu TL, atu nune’e bele tau matan ba povu sira ne’ebé hela iha área rural nia nesesidade. Entaun esperensia barak ne’ebé ita hetan, no ita mós apresia ho Primeiru Ministru nian hanoin katak presiza ona harii ministeriu dezenvolvimentu rural ho abitasaun ne’e . Tanba ita ukun tinan 20 ona, halo koresaun ba ita nia prosesu ne’e katak tempu ona ita atu ataka iha área rurais ne’e,” dehan VPM iha Palasiu Governu, Tersa (08/08).
Nia esplika, nesesidade baziku ne’ebé ema presiza liu ba mak hahan, hatais no uma, tan ne’e Timor mós tempu ona iha Ministru ida hodi tau matan ba asuntu ne’e. Tanba durante ne’e seidauk iha Ministru ida mak atu tau matan didiak ba asuntu ne’e.
Nia hatete, asuntu ida ne’e la’os governu ho politiku na’in sira deit mak atu hare maibé ne’e ema hotu nia kontribuisau hodi bele halo mudansa ba asuntu ne’e.
Governante dehan, dezenvolvimentu rural ne’e tenki integradu, tan ne’e tau ema hanesan sentru ba dezemvolvimentu entaun governu tenki halo buat ne’ebé importante ba ema liliu ba iha área rurais sira.
“Tanba Timor-Leste iha edukasaun rurais, saúde rurais, estrada rurais, bee moos rurais, eletrisidade rurais, buat hotu ne’ebé iha rurais, tan ne’e ita tenki koordena ho ministeriu seluk hodi halo atividade iha ne’ebá,” katak nia.
Ministru hatete, Saida mak atu halo fazeadamente, ida mak sira ne’ebé iha ona fasilidade, estrada, bee moos, eletrisidade no telekomunikasaun tenki fasilita ona hodi hamoris sira nia ekonomia, tanba estrada ne’ebé governu loke ne’e tenki utiliza ba aspeto ekonomia.
“Lae ita halo estrada too iha area rurais maibé ita la aproveita masimu, dalaruma estrada sai aat tan fali, tan ne’e mak ba ema hotu, lideransa komunitaria no autoriedade munisipiu sira tenki hotu kontribui hodi halp mudansa ida ne’e,” nia esplika.
Nia afirma, hanesan Primeiru Ministru dehan, ema hotu tenki hakuak kauza nasinonal ida, kauza ki’ak ne’ebé povu hasoru, kauza ne’ebé juventude la iha kampu servisu, kauza edukasaun ne’ebé presiza kualidade, kauza m’a nutrisaun ne’ebé mak afeita ba oan sira.
Iha fatin hanesan, Embaixadór Malazia Amarijit Sarjit Sing hatete, governu Malazia iha ona esperensia ne’ebé barak, tanba Malazia iha ona Ministeriu Dezenvolvimentu Rural kuaze tinan 60 ona, tan ne’e husu ba VPM-MKDR atu hare tur modelu ne’ebé Malázia iha ona.
