“Ohin reprezentante UNICEF hasoru malu ho SEKomS hodi ka’olia kona ba pontu rua ida mak oinsá UNICEF ho SEKomS bele hamutuk hodi fó direitu ba labarik, direitu ba labarik ne’e, ita hotu hatene katak ho avansu teknolojia era dijital, oras ne’e dadauk labarik no foinsa’e sira livre los halimar internet no dala barak internet ne’e uza liu husi telemovel android iha nia pontu pozitivu maibé mós iha pontu negativu,” dehan Sekretariu Estadu Komunikasaun Sosial, Expedito Dias Ximenes, hafoin remata enkontru ho Reprezentante UNICEF iha TL,  iha Sala Reuniaun SEKomS, Palasiu Governu, tersa (08/08/23).

Tuir SEKomS, internet saudavel ba labarik sira katak, labarik sira iha ensinu primaria no iha ensinu sekundario bainhira uza internet ba interese disiplina eskola nian, material displina eskola nia ho diak, la’ós atu uza internet ba iha material ne’ebé prejudika sira hanesan iha situs violensia iha laran no pornografia iha laran, ida ne’e mak presiza Evita.

Tan ne’e, Nia dehan, UNICEF husu atu halo koopersaun hodi servisu hamutuk ho SEKomS atu bele kria internet saudavel ba labarik no foinsa’e sira liliu iha eskola no mós fó treinamentu ba joven sira atu bele uza internet ho diak.

Iha fatin hanesan, Reprezentante UNICEF iha TL Billal Durani, hatete, iha tempu badak UNICEF ho SEKomS sei asina nota entendimentu ida hodi kria internet seguru ba labarik sira.

“Ha’u diskuti ho SEKomS hodi ko’alia konaba formasaun ba ita nia labarik no foinsá’e sira kona ba etika reportajem ne’ebé envolve labarik feto no ami kria kona-ba internet saudavel  ba ita nia adolosente no foinsá’e sira oinsá atu utiliza internet ho los,” katak nia.

Ho nune’e, UNICEF senti orgullu no onra boot kontinua nafatin kopersaun entre SEKomS ho UNICEF hodi promove informasaun kona-ba direitu labarik nian.