“Hau hakarak alerta ba inan-aman sira iha munisipíu 14, tanba dadaun ne'e ita iha komunidade ne'ebé uja kilat manu kasa animal fuik sira, ita tenke iha konsiensia no kolabora atu ita labele uja kilat manu hodi estraga animal fuik sira, animal fuik sira ne'e hanesan rikusoin ida nasaun nian hodi bele hatama ekonomia ba ita nia estadu no mós fó benifisia ba ita povu” dehan nia ba jornalista sira, hafoin hala’o vizita ba Illa Jaco foin lalais ne’e.
Governante ne’e hatutan, povu Timor-Leste tomak ne'ebé iha kilat manu no sensor hodi estraga animal fuik sira, husu atu redus ka para ona tanba ida ne'e, fó ameansa ba flora ho fauna sira.
Hare mós ba bailoron naruk, Sekretáriu Estadu Floresta husu ba komunidade sira atu kuidadu ambiente labele tesi ai no sunu rai arbiru iha fatin sira ne’ebé risku ba rai monu.
“Bailoron naruk, tanba ne’e ita presija evita sunu rai iha fatin sira ne'ebé risku no fasil ahi han hanesan Área Batugade, Tibar, Hera, Metinaru no Manatutu, labele tesi ai, labele sunu rai arbiru husi fatin sira ne'ebé saran risku ba rai monu, impaktu husi sunu rai mak hamosu mudansa klimatika, rai monu, rai manas no mós bele halo bee maran tanba bailoron naruk” dehan SEF
