SEKomS Presiza Aprende Étika Komunikasaun Featured

By Artur da Luz Marsu 16, 2018 2171
Ilustrasaun etika Ilustrasaun etika

DILI: Deklarasaun ne’ebé Sekretáriu Estadu Komunikasaun Sosiál (SEKomS), Matias Boavida hasai iha públiku nia-oin kona-ba duun jornalista sira hakerek notísia bazeia ba per diem nu’udar insultu no la étiku.

Sekretáriu Estadu Matias mós presiza atu aprende kona-ba étika komunikasaun. Nune’e, bele hatene di’ak liután saida mak presiza atu ko'alia ho buat ne’ebé la merese atu deklara.

Diretora diáriu Timor Post, Santina de Araújo hatete, deklarasaun ne’ebé sekretáriu estadu hasai iha forum internasionál ne’e loloos la merese ko'alia iha públiku. Bainhira iha faktu, nu'udar superiór tenke hato’o karta ba instituisaun ne’ebé jornalista ne’e hala’o knaar ba.

Infelizmente, deklarasaun ne’e hato’o kedas iha públiku nia-oin, liuliu ema estranjeiru nia-oin. Ida ne’e mak ha’u sente ofendidu tebes saida mak sekretáriu estadu ko'alia”, dehan nia, iha knaar fatin, horisehik.

Nia dehan, deklarasaun ne’e hatún dignidade jornalista timoroan sira, tanba lia-hirak ne’e hasai iha diplomata sira nia-oin.

Nune’e, bele hamosu interpretasaun oioin husi diplomata sira katak, jornalista timoroan sira durante ne’e halo notísia depende de’it ba osan.

Nune’e, Xefe Redasaun Diáriu Timoroman, Cristóvão Alexandre da Costa hateten, jornalista sira balun durante ne’e halo kobertura iha instituisaun governu enfrenta diskriminasaun tanba la halo tratamentu iguál.

Nia dehan, bainhira sekretáriu estadu identifika iha jornalista ruma ne’ebé hakerek notísia bazeia ba per diem karik, bele aprezenta hela faktu ba instituisaun média ne’e rasik nune’e bele foti sansaun ruma hasoru jornalista ne’e.

Tuir nia, deklarasaun ne’e jeneraliza katak durante ne’e jornalista timoroan sira sempre simu subornu mak hakerek notísia kualidade.

Loloos nu'udar membru governu ne’ebé tutela ba servisu média nian maka atu hakbiit jornalista sira, liuliu kapasitasaun no formasaun hodi sai profisionál, la’ós buka maneira hodi hatún sira.

Iha fatin hanesan, Editór Diáriu Timoroman, Teodorico Mauresi da Silva hateten, bainhira iha duni faktu ruma ne'ebé akontese duni ba jornalista sira, tenke hatudu faktu nune’e instituisaun média bele foti desizaun rum aba jornalista ne’e.

Nia dehan, labele deklara liafuan sira ne’e hodi halo públiku sira mós lakon konfiansa ba média nasionál sira, nune’e afeta boot ba jornalista sira iha Timor laran tomak katak dignidade jornalista timoroan laiha ona.

Rate this item
(3 votes)

Independente Digital TV