Jornalista diáriu Timoroman, João Guterres hateten, durante sira hala'o servisu iha Palásiu Governu barak balun hetan 'mal tratamentu' husi SEKomS, liuliu iha kobertura ba atividade Governu nian.

Nia esplika, dala barak vizita servisu Primeiru Ministru nian ba munisípiu, SEKomS bolu de’it jornalista husi média balun de’it, inklui jornalista média partidu balun nian.

“SEKomS la fó importánsia ba ami jornalista imprime sira, maibé tau prioridade liu ba jornalista husi média televizaun, inklui televizaun partidu nian balu”, dehan nia, iha Palásiu Governu, horisehik.

Tanba ne’e, jornalista sira ne’ebé beat iha Palásiu Governu sente hetan diskriminasaun ba atendimentu jornalista sira ninia servisu.

Antes ne’e, Sekretáriu Estadu Komunikasaun Sosiál (SEKomS), Matias Boavida, duun katak jornalista sira la tau prioridade ba eventu ne’ebé governu halo, maibé fó importánsia ba osan perdiem ne’ebé Governu fó.

Nia esplika, jornalista barak mak la konsege tuir atividade membru Governu halo vizita servisu iha munisípiu tanba laiha osan atu selu sira nia perdiem.

“Kobertura sira ne’ebé ita iha por razaun perdiem sira liga ho membru Governu sira ba, dala wa’in a kuantidade perdiem sai sasukat ba jornalista sira atu tuir kobertura”, dehan nia, iha lansamentu Auto Regulasaun Média, iha Novo Turismo, Lesidere, Tersa (13/3).

Nia dehan, bainhira xefe governu halo vizita traballu iha munisípiu bolu de'it mak instituisaun média ida, nune’e la konvida média nasionál seluk atu halo kobertura tanba SEKomS laiha fundu atu selu perdiem ba jornalista sira.

Nu'udar sekretáriu estadu, nia labele foti desizaun, tanba Governu osan laiha. Ne’e duni, SEKOMS la’ós atu halo diskriminasaun maibé laiha osan atu selu alojamentu jornalista sira.

Haree ba kestaun ne’e, Prezidente Konsellu Imprensa (KI), Virgílio Guterres hatete, perdiem ne’e iha situasaun balun bele aseita tanba mai ho kondisaun. Perdiem ne’e la mai hodi kompromete ho jornalista nia profisionalizmu, maibé tenke ho kompromisu balun bainhira osan ne’ebé fasilita hanesan fasilita viajen. Nune’e, lakuna balun mak akontese iha terrenu tenke observa no hakerek hodi publika.

Nia dehan, di'ak liu jornalista bainhira viajen ba munisípiu tenke finansia husi instituisaun média ne’ebé servisu ba, nune’e jornalista labele iha patraun rua bainhira hetan konvida husi instituisaun Governu.

Prezidente KI deklara, prezensa jornalizmu iha mundu la’ós halo ema hotu kontente, maibé tenke esforsa-aan nune’e ema hotu respeitu profisaun jornalista iha Timor-Leste.

Tanba ne’e, kostume ne’ebé hala’o ne’e la’ós jornalista mak ezije, maibé falla husi polítiku sira hodi fó osan subsídiu ba jornalista, nune’e promove polítiku sira programa iha públiku.