Ne’e duni, komisáriu Adérito hasoru malu ho Prezidente Repúblika hodi halo avaliasaun durante ninia mandatu servisu iha KAK.

“Ha’u husu ba Prezidente Repúblika fó ninia hanoin ruma kona-ba servisu ne’ebé Komisaun Anti Korrupsaun halo durante ne’e”, dehan nia, hafoin soru-mutu ho Prezidente Repúblika, iha Palásiu Prezidensiál Bairru-Pité, horisehik.

Nia dehan, Prezidente Repúblika mós iha prinsípiu ne’ebé suporta tebes servisu ne’ebé durante ne’e KAK halo. Nia akompaña ona mezmu dala ruma informasaun sira ne’e liu husi média.

Xefe Estadu mós enkoraja servisu KAK nian. Importante liu maka servisu ne’ebé halo ne’e la’o tuir dalan lei.

Alende ne’e mós Komisáriu mós informa kona-ba servisu sira ne’ebé durante 2017-2018 kona-ba servisu iha parte investigasaun nian hanesan mós servisu iha parte prevensaun nian ne’ebé hala’o durante ne’e.

Adérito Pinto Tilman, ofisialmente simu pose nu’udar Komisáriu Anti Korrupsaun iha fulan Jullu 2014. Tuir Lei KAK mandatu servisu komisáriu no adjuntu komisáriu KAK nian durasaun tinan haat no bele aumenta dala ida ba segundu mandatu.