Xanana-Alkatiri sei ‘Ibun Toos’ Ba Malu Featured

By Artur da Luz Marsu 16, 2018 781
Xanana ho Alkatiri Xanana ho Alkatiri

DILI: Xefe Negosiadór Prinsipál Delimitasaun Fronteira Tasi Timor, Kay Rala Xanana Gusmão, fila ona husi estranjeiru, iha Domingu (11/3), hafoin remata prosesu asina akordu baliza tasi permanente ho Austrália, maibé seidauk iha komunikasaun ho Primeiru Ministru, Mari Alkatiri.

Hafoin loron haat to’o iha Timor, lider na’in rua ne’e sei ‘ibun toos’ ba malu. Na’in rua ne’e seidauk iha kontaktu hodi haree ba prosesu saida mak Estadu no Governu Timor-Leste presiza halo kona-ba dezenvolvimentu kampu mina Greater Sunrise.

Ne’e duni, Primeiru Ministru, Mari Alkatiri, husu ba xefe negosiadór Kay Rala Xanana Gusmão ho Ministru Agio Pereira atu bele aprezenta dokumentu ba Governu kona-ba akordu fronteira marítima nian.

Nia dehan, nu'udar xefe Governu atu husu sira na’in rua aprezenta kona-ba relatóriu ikus no mós akta. Nune’e, Governu bele halo diskusaun iha Konsellu Ministru hodi halo aprovasaun ba dokumentu ne’e.

Ha'u atu konvoka reuniaun ne’e atu husu bainhira mak relatóriu mai no bainhira mak akta sira ne’e mai”, dehan Alkatiri, iha Sentru Konvensaun Dili (SKD), horisehik.

Maski nune’e, to’o ohin loron seidauk iha kontaktu ruma atu halo reuniaun ruma. Tanba ne’e laiha serteza bainhira mak atu iha enkontru entre sira.

Kona-ba prosesu ne’e, Alkatiri dehan, akordu ba dezenvolvimentu Greater Sunrise nian serteza ona, maibé prosesu negosiasaun ba esplorasaun ne’e rasik sei iha prosesu laran.

Rate this item
(0 votes)

Independente Digital TV