Maneira atu fortifika, Expedito hatutan, mak fortifika liu husi fó apoiu indireitu ba instituisaun media no apoiu mós hodi fó kapasitasaun ba jornalista sira.
Sekretariu Estadu hato’o ninia observasaun ne’e bainhira hala’o vizita servisu ba edifisiu Jornal INDEPENDENTE hodi haree direitamente kondisaun no servisu husi ekipa tomak Jornal INDEPENDENTE nian.
Daudauk ne’e, nia dehan, governu dasia liu husi SEKomS fó apoiu indireitu ba jornal lima, inklui Jornal INDEPENDENTE, liu husi sosa jornal hodi fahe ba populasaun sira iha Postu Administrativu sira atu bele lee informasaun sira relasiona ho dezenvolvimentu nasional no internasional.
Tuir nia, jornalista iha Jornal, Televizaun ka Radiu sempre iha dezafiu kona-ba kobertura no mos kestaun administrative sira, maibé dezafiu sira ne'e sei bele rezolve bainhira servisu hamutuk.
Tanba, problema ne'ebé daudaun media barak hasoru mak oinsa atu jere meiu komunikasaun sosial ne'e ho di'ak.
Maibé, nia dehan, SEKomS haree iha deferensia boot tanba jornal INDEPENDENTE maske foin harii maibé hatudu nia jestaun ne'ebé di'ak.
Bainhira ko'alia kona-ba kualidade informasaun, Expedito dehan, importante ba jornalista sira atu check, recheck no crosscheck, tanba media labele halo notisia ho rumoris hodi hamosu hoax, no seluk mak linguajen ne'ebé media uza.
"Linguajen ne'e dala-barak tetun ne'e kahur ho portuges, kahur ho Ingles, no tetun ne'e dala barak ho bahasa, entaun linguajen sira ne'e hakerek dala-barak publiku ne'ebe lee, rona ou haree, dúvida, tan la kompriende, ida ne'e determina iha kualidade ita-nia produru jornalistiku nian."
Tanba ne'e, nia hatete, iha mandatu governu dasia konsiente katak atu bele hadia linguajen jornalista sira nian mak presiza servisu hamutuk ho Institutu Camões no CEFTEC, hodi fasilita formasaun tekniku komunikasaun ba jornalista sira.
Iha fatin hanesan, Diretor Jornal INDEPENDENTE, José Sarito Amaral, konsidera apresiasaun husi SEKomS no husi Konseleiru Konsellu Imprensa nu’udar motivasaun ida ba ekipa Jornal INDEPENDENTE tomak.
"Ne’e hanesan motivasaun ba ita atu kontinua nafatin ita-nia obra jornalistiku, la'os dehan katak tanba premiu ne'ebe ita iha esforsu, maibé tanba oinsa ita atu servi publiku ho independente, imparsial, no oinsa ita bele nafatin sai neutru ou sai ponte ba ema hotu, la'os ba grupu, la'os ba ema balun de'it maibé ba ema hotu," dehan Sarito.
