Konseleiru KI: Hatudu Kualidade Jornal INDEPENDENTE Featured

By Ivonia varella Outubru 31, 2023 1773
Konseleiru Konseilu Imprensa, Benevides Correia Barros hamutuk ho Sekretariu Estadu Komunikasaun Sosial, Expedito Loro Dias Ximenes hala'o diskusaun aberta ho Xefe Redasaun no Diretor Jornal INDEPENDENTE, iha studio 2 INDEPENDENTE, Hudi Laran, (30/10/23). Foto:INDEPENDENTE. Konseleiru Konseilu Imprensa, Benevides Correia Barros hamutuk ho Sekretariu Estadu Komunikasaun Sosial, Expedito Loro Dias Ximenes hala'o diskusaun aberta ho Xefe Redasaun no Diretor Jornal INDEPENDENTE, iha studio 2 INDEPENDENTE, Hudi Laran, (30/10/23). Foto:INDEPENDENTE.

DILI: Konseleiru Konseilu Imprensa, Benevides Correia Barros fó parabéns ba Jornal INDEPENDENTE ne’ebé hatudu ninia kualidade, liu husi kapasidade intelektual, tekniku no profisional.

"Parabéns, (premiu) ida ne'e hakarak hatudu buat tolu: kapasidade intelektual, kapasidade tekninu ho profisional ne'e iha ne'ebá. Ne'e prova konkreta ona ba INDEPENDENTE, maske ho kondisaun minimu, entermus infra-estrutura, salariu no fasilidade, kompara ho media balun, maibé INDEPENDENTE nia kualidade hatudu iha ne'ebá," afirma nia, bainhira akompaña Sekretariu Estadu Komunikasaun Sosial vizita edifisiu Jornal INDEPENDENTE, Hudi Laran, Segunda (30/10).

Entretantu, Sekretariu Estadu Komunikasaun Sosial, Expedito Loro Dias Ximenes mós hato'o apresiasaun ba Jornal INDEPENDENTE ne’ebé sai nu’udar manan-nain ba premiu dala hat tutuir malu, husi Konsellu Imprensa dala ida no Centro Nasional Chega! dala tolu.

Tuir nia, apresiasaun ne’ebé Konsellu Imprensa no CNC fó hatudu mós katak Jornal INDEPENDENTE servisu duni ho independente.

Iha fatin hanesan, Diretor Jornal INDEPENDENTE, José Sarito Amaral, konsidera apresiasaun husi SEKomS no husi Konseleiru Konsellu Imprensa nu’udar motivasaun ida ba ekipa Jornal INDEPENDENTE tomak.

"Ne’e hanesan motivasaun ba ita atu kontinua nafatin ita-nia obra jornalistiku, la'os dehan katak tanba premiu ne'ebe ita iha esforsu, maibé tanba oinsa ita atu servi publiku ho independente, imparsial, no oinsa ita bele nafatin sai neutru ou sai ponte ba ema hotu, la'os ba grupu, la'os ba ema balun de'it maibé ba ema hotu," dehan Sarito.

Jornal INDEPENDENTE sai manan na’in ba Premíu Balivo Five dahuluk iha tinan 2020, premiu husi Konsellu Imprensa, ho titlu nudar meu-komunikasaun social ne’ebé trata ho di’ak liu direitu baziku (Bem star) ba jornalista sira.

Tinan 2021, premiu husi Centro Nasional Chega (CNC) ho titlu fó ona kontribuisaun ba promove paz no proteze direitu humanos liuhusi obra jurnalistiku ho foto no notisia

Tinan 2022, Jornal INDEPENDENTE hetan tan premiu husi CNC ho titlu fó ona kontribuisaun ba promove paz no proteze direitu humanos liuhusi obra jurnalistiku ho foto no notisia.

Tinan 2023, premiu husi CNC ho titlu fó ona kontribuisaun ba promove paz no proteze direitu humanos liuhusi obra jurnalistiku notisia.

Rate this item
(0 votes)
Last modified on Tersa, 31 Outubru 2023 21:41

Independente Digital TV