SEKomS Apresia Jornál INDEPENDENTE Servisu Duni ho Independente Featured

By Ivonia Varella Outubru 31, 2023 1498
Ekipa INDEPENDENTE foto hamutuk ho Sekretariu Estadu Komunikasaun Sosial, Expedito Loro Dias Ximenes, hafoin remata vizita iha Jornal INDEPENDENTE, Hudi Laran, Dili, (30/10/23). Ekipa INDEPENDENTE foto hamutuk ho Sekretariu Estadu Komunikasaun Sosial, Expedito Loro Dias Ximenes, hafoin remata vizita iha Jornal INDEPENDENTE, Hudi Laran, Dili, (30/10/23).

DILI: Sekretariu Estadu Komunikasaun Sosial, Expedito Loro Dias Ximenes hato'o apresiasaun ba Jornal INDEPENDENTE ne’ebé sai nu’udar manan-nain ba premiu husi Konsellu Imprensa no Centro Nasional Chega! dala hat tutuir-malu.

Tuir nia, apresiasaun ne’ebé Konsellu Imprensa no CNC fó hatudu mós katak Jornal INDEPENDENTE servisu duni ho independente.

"Konserteza tanba ho apresiasaun prémiu ne'ebé INDEPENDENTE hetan durante tinan hirak nia laran hatudu katak Jornalista sira iha Jornal INDEPENDENTE hatudu duni sira-nia responsabilidade iha nia servisu. Tanba ne'e ha'u mai iha ne'e atu apresia ou agradese no hato'o parabéns ba servisu ne'ebé hala'o durante ne'e," dehan Expedito bainhira vizita edifisiu Jornal INDEPENDENTE, Hudi Laran, Segunda (30/10).

Tuir Expedito, premiu hirak ne'ebé Jornal INDEPENDENTE hetan, hatudu katak ekipa tomak iha Jornal INDEPENDENTE servisu duni ho responsabilidade no hala’o duni ninia knar tuir kodigu etika jornalizmu nian.

Iha fatin hanesan, Diretor Jornal INDEPENDENTE, José Sarito Amaral, konsidera apresiasaun husi SEKomS no husi Konseleiru Konsellu Imprensa nu’udar motivasaun ida ba ekipa Jornal INDEPENDENTE tomak.

"Ne’e hanesan motivasaun ba ita atu kontinua nafatin ita-nia obra jornalistiku, la'os dehan katak tanba premiu ne'ebe ita iha esforsu, maibé tanba oinsa ita atu servi publiku ho independente, imparsial, no oinsa ita bele nafatin sai neutru ou sai ponte ba ema hotu, la'os ba grupu, la'os ba ema balun de'it maibé ba ema hotu," dehan Sarito.

Jornal INDEPENDENTE sai manan na’in ba Premíu Balivo Five dahuluk iha tinan 2020, premiu husi Konsellu Imprensa, ho titlu nudar meu-komunikasaun social ne’ebé trata ho di’ak liu direitu baziku (Bem star) ba jornalista sira.

Tinan 2021, premiu husi Centro Nasional Chega (CNC) ho titlu fó ona kontribuisaun ba promove paz no proteze direitu humanos liuhusi obra jurnalistiku ho foto no notisia

Tinan 2022, Jornal INDEPENDENTE hetan tan premiu husi CNC ho titlu fó ona kontribuisaun ba promove paz no proteze direitu humanos liuhusi obra jurnalistiku ho foto no notisia.

Tinan 2023, premiu husi CNC ho titlu fó ona kontribuisaun ba promove paz no proteze direitu humanos liuhusi obra jurnalistiku notisia.

Rate this item
(0 votes)
Last modified on Tersa, 31 Outubru 2023 21:31

Independente Digital TV