“Ha'u husu ba média Nasionál sira hotu, apoiu Transmite servisu susesu no defaziu PNTL iha tinan rua nulu resin lima nia laran, asegura seguransa ba povu no nasaun Timor-Leste, nune'e públiku bele akompaña,” dehan Sekretáriu Estadu Komunikasaun Sosiál, Expedito Dias Ximenes, hafoin remata enkontru ho Komandante Jerál PNTL, iha Kuartel Jerál PNTL, Kaikoli, Dili, tersa ne’e (18/02/25).
Komemorasaun tinan 25, ezistensia Instituisaun PNTL ne'ebé sei hala'o iha 27 fulan-Marsu tinan ne’e, Sekretáriu Estadu Komunikasaun Sosiál garante katak, média hotu sei partisipa masimu, tanba iha loron ne'e povu tomak sei akompaña dezempeñu servisu PNTL nian durante tinan 25 nia laran.
Tan ne’e, iha serimonia komemorasaun ezistensia PNTL ba dala-25, media live streaming sira no mós Rádiu Televizaun Timor-Leste, Empresa Públika (RTTL.EP) sei halo transmisaun direita ba atividade refere, tanba iha selebrasaun ne’e sei iha mós promosaun diviza ba membru Polísia sira.
Iha fatin hanesan Komandante Jerál PNTL, Komisariu Jerál Polísia Henrique da Costa hateten, media nia papel importante tebes, tanba ne'e, servisu PNTL nian presiza komunidade hotu akompaña, durante tinan ruanulu resin lima nia laran.
“Entaun ita husu Sekretáriu Estadu Komunikasaun Sosiál bele tulun ita iha eventu komemorasaun ezistensia PNTL tinan rua nulu resin lima ne'e, média sira bele transmite mensajem ba públiku atu hatene no ita husu para atualiza atividade hotu ne'ebé polísia sira halo iha munisípiu to'o iha nasionál,” informa nia.
KomJer afirma, durante tinan ruanulu resin lima ne'e komúnidade bele akompaña atividade hotu ne'ebé PNTL halo iha munisípiu to'o nasionál, iha buat ne'ebé di'ak no la di'ak, komunidade sira bele hato’o kritika atu hadi’a, tanba prezensa PNTL, atu serví komunidade sira.
“Durante tinan ruanulu resin lima ne'e ami halo buat hotu ami hanoin los, maibé parte husi públiku nia haree ida ne'ebé la los ne'e, entaun mesajem ho kritika sira ne'e hadia ami preparasaun servisu fo atendimentu di'ak ba públiku," hakotu nia.
Entretantu, tema ba komemorasaun ezistensia tinan 25 insituisaun PNTL iha Timor-Leste mak “Haforsa no Hetan Konfiansa husi Komunidade kona-ba Servisu Polísia nian”.
