Mini-konferensia ne'ebé Institutu Nasional Defeza (IDN) realiza ho tema “Kapasitasaun no Dezafiu ba Forsa Defeza no Seguransa iha Timor-Leste: Análize Krítika no Perspetiva ba Operasaun iha Senáriu Komplexu”, ne’ebé raliza iha Auditóriu IDN, Palasiu Governu, Dili, tersa ne’e (18/02/25).
Adjuntu Diretór IDN, kapitaun Fragata Duarte Borges Loe hatete, iha debate mini konferensia ne'e, iha asuntu fundamentál haat ne'ebé deskute, hodi determina kapasidade operasional FALINTIL-Forsa Defeza Timor-Leste (F-FDTL) no Polísia Nasional Timor-Leste (PNTL) nian.
Tan ne'e, asuntu haat ne'ebé atu deskute maka kapasidade intervensaun F-FDTL iha asisténsia apoiu umanitaria, jestaun lideransa, prevensaun iha krime transnasional, dezenvolvimentu dezafiu governasaun iha kapasidade operasional autoridade marítima Nasional no Kapasitasaun modernizasaun bá Forsa Defeza no Seguransa Timor-Leste.
“Tanba ita hatene katak dezastre naturais no krime umanitaria bele akontese bainhira de'it, tanba ne'e mak prontidaun forsa armadas krusial no esensiál, ba sira iha prontidaun ne'ebé maka diak presiza modernizasaun bá lojistika, presiza kooperasaun interinstituisional no presiza formasaun kualifikasaun ne'ebé diak no apoiu mós ho teknolojia,” dehan nia.
Adjuntu Diretór IDN hatutan, iha konferénsia ne'e identifika dezafiu lubuk, maibé hato'o mós oportunidade sira ne'ebé bele esplora hanesan kontinua fó formasaun ba rekursu umanu, presiza aposta iha inovasaun teknolojia maibé tenki iha kooperasaun interinstituisional no kooperasaun ho nasaun viziñu sira.
“Xave husi dezafiu sira ne’e mak tenki iha vontade polítika no tenki iha insvetimentu finanseiru ne'ebé diak adekuadu, relevante bá misaun ne'ebé ita atribui bá sira, no presiza polítika ida nune'e mak ita nia forsa Defeza no Seguransa ne'e bele fó seguransa bá Timor ida seguru, soberania no rejilente," katak adjuntu.
Entretantu, iha mini konferénsia ne'e, fó mós oportunidade ba alunu na’in haat husi Kursu Estado-Maior Konjuntu no Integradu (CEMCI 2024/2025), sai oradór hodi halo palestra mak hanesan, koronel reformadu Antonio José Sampaio e Silva, Kapitaun Fragata Julião Pinto da Silva, Tenente Koronel Gregorio Bernardo Correia no Superintendente Asistente Polisia Silveiro de Araújo hodi hato’o hanoin importante kona-ba seguransa no defesa nian.
Oradór sira nia biografia:
- Koronel Reformadu Antonio Jose Sampaio e Silva, nia iha esperiénsia militár ne’ebé kle’an, nu’udar koronél reformadu iha Ezérsitu Portugés, tuir kursu Infantaria iha Akademia Militár, no nu’udar profesór iha eskola superiór Forsa Seguransa Makau nian. Oras ne’e daudaun nu’udar asesór ba F-FDTL no nu’udar profesór iha Institutu Defeza Nasionál.
- Kapitaun Fragata Julião Pinto da Silva, nia hetan lisensiatura no mestradu iha área Direitu husi Universidade Dili no kompleta Kursu CPOS iha tinan 2017. Oras ne’e daudaun nu’udar Adjuntu Diretór Autoridade Marítima Nasionál.
- Tenente Koronel Gregorio Bernardo Correia, nu’udar lisensiatura Direitu husi Universidade da Paz iha Dili, kompleta kursu pós-graduasaun iha Estudu Estratéjiku iha Institutu Defeza Nasionál, kompleta Kursu CPOS iha tinan 2019, no nu’udar estudante Mestradu iha Seguransa no Dezenvolvimentu Nasionál Sustentável. Agora daudaun nia maka Komandante IIº Batallaun IIº Setór Súl nian.
- Superintendente Assistente Silverio de Araújo, nu’udar lisensiatura iha Polítika Públika husi Universidade Nasionál Timor-Leste no remata Kursu CPOS iha tinan 2015. Agora daudaun nu’udar Komandante Interinu da-2 iha Unidade Espesiál Polísia nian.
