Tuir sirkular ne’ebé fó sai husi Diretora Ezekutiva Prezidente Konsellu Diretiva HNGV katak, vizitante ka Familia Pasiente no funsionariu HNGV bandu fuma, hemu tua no lori sasan kroat iha área HNGV no mós bandu vendedór atu fan sigaru iha area refere.

Tanba, óspitál mak fatin ida ne'ebé livre husi fuma, tuir dekreto lei no.14/2016 artigu 5 kona ba rejime kontrola tabaku.

“Bandu fuma importante tebes implementa iha HNGV tanba iha área óspital risku ba inséndiu no iha materiál inflamavel barak iha HNGV, ezemplu gás oksijéniu,”dehan komunikadu ne’ebé Online INDEPENDENTE sita, tersa ne’e (18/02/25).

Ho nune’e, Iha área HNGV distribui ona pamfletu ka poster bandu fuma iha unidade ka enfermaria no mós iha koridor óspital bainhira vizitante ka funsionariu sira fuma iha área óspital, Pesoál Servisu Seguransa HNGV sira sei fó reprensaun no diretamente foti ka hadau ita bo’ot sira nia sigaru.

Tanba ne’e, hahú husi fulan Novembo tinan 2024 to’o Fevereiro 2025, Pesoál Servisu Seguransa foti ona sigaru husi vizitante sira hamutuk 30, Joker 3, Tabaku 2, Gas (Iskeiro) 47 no sasan kroat hanesan tudik hamutuk 3.

“Ita hatene katak impaktu husi fuma sigaru ba ita nia saúde bo’ot tebes, ne’ebé dala barak ábitu ida-ne'e hamosu problema saúde oioin, hanesan kankru, estragu pulmaun, problema matan, moras reprodutivu no Komplikasaun inan isin-rua nian,”tenik komunikadu refere.

Alende ne’e mós, fuma iha área óspitál bele fó perigu ba saúde públika, liuliu ba maluk pasiente sira ne'ebé iha istória moras fuan, asma, no moras pulmaun.

“Liu husi informasaun ida ne’e hakarak apela ba vizitante,  familia hein moras no funsionario HNGV atu kopera no servisu hamutuk hodi kuidadu pasiente no ita hotu nia saúde,”hakotu komunikadu refere.