Prezidente Lourenço asume prezidénsia rotativa UA nian durante Sesaun Ordinária ba dala 38 husi Asembleia Xefe Estadu no Governu nian ne'ebé hala'o iha Adis Abeba, Etiópia, iha loron 15 fulan-Fevereiru tinan 2025.
João Manuel Gonçalves Lourenço troka Prezidente Mohamed Ould Cheikh Ghazouani husi Mauritania, ne'ebé dezempeña funsaun nu'udar prezidente durante tinan 2024.
Iha karta ofisiál Prezidente Mohamed, hato’o parabens ba Prezidente Lourenço, ne’ebé fó sai iha loron 17 Fevereiru 2025, Prezidente Ramos-Horta nota katak nomeasaun ne'e rekoñese Prezidente Lourenço nia dedikasaun no kompromisu metin ba progresu Angola no kontinente afrikanu nian.
Prezidente Ramos-Horta mós elojia Prezidente Lourenço nia diskursu aseitasaun, ne’ebé trasa vizaun ida ne’ebé klaru ba promove unidade, rezolve konflitu sira, no rezolve dezafiu globál sira ne’ebé afeta rejiaun ne’e.
Prezidente Ramos-Horta subliña katak Timor-Leste fahe valór fundamentál sira ho Angola no Uniaun Afrikana.
“Hodi afirma, ami fiar katak Ita-nia lideransa sei kontinua hametin kooperasaun rejionál no internasionál, promove pás, estabilidade no dezenvolvimentu sustentável,”dehan komunikadu ne’ebé Online INDEPENDENTE sita, tersa ne’e (18/02/25).
Rekorda katak, iha Simeira UA ba dala 38, ne'ebé hala'o iha loron 15-16 fulan-Fevereiru tinan 2025, adopta tema “Justisa ba Afrikanu sira no Ema ho Descendénsia Afrikana Liu Husi Reparasaun ba tinan 2025”.
Entretantu, iha nia papél nu'udar Prezidente foun UA nian, Prezidente Lourenço promete ona atu foka ba hakotu konflitu sira iha Áfrika, responde ba mudansa inkonstitusionál sira governu nian, kombate terorizmu, no hasoru dezafiu sira relasiona ho mudansa klimátika no ameasa saúde públika.
Enkuantu, Prezidente Ramos-Horta hatutan Timor-Leste nia kompromisu atu aprofunda diálogu no parseria ho Uniaun Afrikana ba benefísiu mútuu sira nia povu.
