Tuir komunikadu ne’ebé online INDEPENDENTE asesu iha Pájina ofisiál Primeiru-Ministru Kay Rala Xanana Gusmão katak, Primeiru-Ministru Husu atu garante páz tanba autoridade Repúblika Demokrátika Timor-Leste (RDTL) ho Repúblika Indonézia (RI) sei rezolve kestaun disputa rai-maran nian.
“Lalika provoka malu hodi kria problema, tanba ita nunka manán buat ida. Ita hakarak atu manán amizade no páz iha fronteira ne’e. Ha’u sei ko’alia ho atuál Prezidente Repúblika Indonézia Prabowo Subianto hodi rezolve kestaun fronteira tuir Lei Internasionál nian,” dehan PM Xanana Liu husi Komunikadu ne'ebé Online INDEPENDENTE sita Kuarta ne’e (19/02/25).
Komunikadu ne’e haktuir tan katak, Xanana Gusmão husu ida ne’e, tanba povu iha fronteira rai rua iha ligasaun família no ligasaun kulturál ne’ebé metin desde tempu bei-ala sira nian no bá futuru.
Primeiru-Ministru enkoraza mós autoridade seguransa liu-liu Unidade Patrullamentu Fronteira (UPF) atu hala’o misaun no sai autór páz nian iha fronteira.
Iha fatin hanesan, Jestór Sub-Rejiaun Nitibe, Agustinho Afulit aprezenta bá Primeiru-Ministru katak, nia parte komunika beibeik ona ho autoridade husi Amfoang Timur, hodi diskute kauza prinsipál ne’ebé sempre hamosu problema entre povu rai rua nian iha fronteira.
Maski via telefónika, maibé iha komunikasaun entre parte rua lori rezultadu pozitivu, atu iha loron ruma bele nahe biti tuur hamutuk hodi kria páz no ko’alia kona-bá promosaun ambiente hakmatek iha liña fronteira.
Jestor Sub-Rejiaun Nitibe iha esperansa katak, autoridade nasaun rua nian, sei define loloos kona-bá fronteira ka markasaun fronteira bazeia bá Lei Internasaionál no desizaun ne‘ebé lori benefísiu bá povu rai rua iha fronteira.
“Ami promete bá Primeiru-Ministru katak, ami sei esforsu atu koordena hodi halo promosaun páz nian entre autoridade sira iha Nitibe ho Amfoang Timur, nune’e bele moris iha armonia,” nia promete.
Iha vizita ne’e, Primeiru-Ministru akompaña husi Prezidente Autoridade Rejiaun Adminitrativa Espesiál Oecusse Ambeno (RAEOA), Rogério Tiago Lobato ho Koordenadór Komisaun Ezekutiva, Zona Ekonómiku Espesiál Dezenvolvimentu Oecusse Ambeno (ZEEDOA), João Mendes Gonçalves ho estrutura, Komandante Unidade Patrullamentu Fronteira, Superintendente Euclides Belo no Komandante PNTL RAEOA.
