Sistema dijitalizasaun saúde ne’e hanesan programa ida husi IX Governu Konstitusionál no hahú implementa ona dijitalizasaun iha administrasaun públika hahú hosi RAEOA.
Primeiru-Ministru Kay Rala Xanana Gusmão konsidera dijitalizasaun sistema saúde ne’e importante atu bele hafásil servisu, maibé tenke hetan mós apoiu integradu husi área importante sira seluk hanesan estrada, eletrisidade no seluk tán.
"Dijitalizasaun seitor saúde bele la'o ho di'ak, buat sira seluk mós tenke book-aan hodi kompleta malu, sé lae dijitalizasaun ne'e hela ho mehi de'it," dehan PM Xanana liu husi Komunikadu ne'ebé Online INDEPENDENTE sita, kuarta ne’e (19/02/25).
Tanba ne’e, la to’o de’it iha lansamentu ne’e no Xefe Governu dehan, la’ós ohin lansameentu ne’e halo ona Oecusse naran bo’ot ona la’e, tenke servisu makas liu-tán iha área hotu-hotu tanba servisu sei barak.
Iha fatin hanesan, Prezidente Autoridade RAEOA, Rogério Tiago Lobato introdús katak, dijitalizasaun ne’e komesa husi RAEOA no espera katak, ho programa ida-ne’e bele sai hanesan projetu pilotu ida bá Timor-Leste laran tomak, tanba prosesu dezenvolvimentu iha mundu tama ona iha dijitál no laiha ona servisu manuál.
Biban hanesan, Sekretáriu Rejionál Asuntu Saúde, Luis de Jesus Neno relata, RAEOA iha Ospitál Referál ida, Sentru Saúde 5, Postu Saúde 20 no agora daudaun aumenta fatin tratamentu iha suku 11 iha área remotas.
"Ita aumenta fatin tratamentu 11, tanba tinan barak nia laran ferik katuas sira hela ho distansia dook la asesu ba atendimentu saúde," katak Sekretáriu Rejionál Asuntu Saúde
Ho lansamentu ne’e, Luis Neno garante katak, sei hafásil iha rekolla dadus saúde nian ne’ebé iha no programa ida-ne’e, sei instala iha fasilidade saúde hotu iha RAEOA.
“Husi sistema dijitalizasaun ne’e, bainhira pessoál saúde sira hala’o tratamentu karik iha loron ohin, bele asesu kedan dadus ne’e ho lais liu-liu totál pasiente, tipu moras ne’ebé númeru aas-liu iha RAEOA, pasiente ho kategoria labarik, joven, ferik no katuas, inklui bele hatene kedan ho item medikamentus hira mak utiliza”tenik nia.
Entretantu, partisipa iha serimónia lansamentu ne’e, Sekretáriu Rejionál sira, Autoridade Seguransa, funsionáriu sira RAEOA nian, autoridade lokál no populasaun.
