Tuir informasaun ne'ebé Online INDEPENDENTE asesu iha terenu katak, Autoridade Seguransa Polísia Nasionál Timor-Leste liu husi Departamentu Investigasaun Kriminál Nasionál (DIKN) ezekuta mandadu buska domisiliariu husi Tribunálál Primeira Instansia Suai ho NUK 0037/25. PNSIC, hasoru Komisariu CCLN Munisípiu Kovalima iha nia rezidensia, tanba halo kobransa ilegal hodi fasilita rejistu Veteranus falsu tinan 2009.
Hafoin Autoridade Seguransa, ezekuta mandadu buska domisiliariu iha rezidensia Komisariu CCLN, Aldeia Asu-maten, Suku Debus, Postu Administrativu Suai, Munisípiu Kovalima, konsege prende evidensia Kareta ida ho sapa Matrikula A. 15.128 TL, osan dolar amerikanu $70.00, Konta bankaria tolu, tais feto 14 no mane 28, osan mean ho korente mean, formulariu dokumentu rejistu Konsellu Kombatentes Libertasaun Nasionál ne'ebé fasilita rejistu Veteranus tinan 2009 ho bala musan 246 ho karegador liman.
Iha operasaun ezekuta mandadu buska domisiliariu ne'e hahú iha oras tuku 08:00 to'o 09:46 dader, hafoin remata halo buska, Autoridade Seguransa PNTL husi Departamentu Investigasaun Kriminál Nasionál (DIKN) kontinua kedas lori evidensia ho Komisariu CCLN Munisípiu Kovalima ba iha Komandu PNTL Munisípiu Kovalima hodi halo indentifikasaun, molok aprezenta rezultadu auto notisia ba iha Ministeriu Públiku (MP), atu kontinua prosesu ba tribunál Judisial Primeira Instansia Suai atu foti desizaun.
Entretantu, ekipa ne'ebé ezekuta mandadu buska domisiliariu ne'e lidera husi Xefe Departamentu Investigasaun Kriminál Nasionál (DIKN) Superintendente Polísia João Belo dos Reis hetan apoiu husi komandu PNTL Munisípiu Kovalima no Servisu Nasionál Intelijensia destakadu iha Munisípiu Kovalima.
