Prezidente INCSIDA, Daniel Marsal hatete, tempu agora joven feto no mane barak mak haluha sira nia futuru no moris iha risku nia laran, nune’e atu Evita ida ne’e, maka INCSIDA sei servisu hamutuk ho Autoridade lokal sira hodi halo regulamentu ida hodi regula joven sira ne’ebé lori malu kos.
"Agora ami hela koordenasaun ho autoridade bele ka lae ita halo regulamentu ba Kos sira tenki iha, tanba ita hare jovem feto no mane lori malu ba Kos, inan aman sira agora terus ba oan sira nia futuru. Tanba ne'e maka sé bele ita regula kos sira para salva ita nia jovem sira,” dehan Prezidente INSIDA iha iha areadores AHHA Education Bekora, Kuarta (19/02).
Daniel Marçal hatutan, INCSIDA mós dadaun ne’e halo ona kontaktu ho autoridade Munisipiu inklui imigrasaun no autoridade kompetente sira seluk atu halo inspesaun ba ótel ho salon sira iha Dili laran.
"Agora iha prosesu kontaktu ho autoridade komponente ami sei koordena ho imigrasaun, koordena ho autoridade munispiu sira para ita atu hamutuk hodi halo inspesaun sira ne'ebe nesesidade tebes hare hotel sira ne'e, no laos hotel de'it fatin sira salon tanba salon sira ita hare iha tau salon maibé ita kotuk tau kama sira ne'e atu halo saida, ida nee mak apoiu ba sirkulasaun virus HIV/SIDA ne'e," Prezidente informa.
Iha fatin hanesan, Reprezentante Autoridade Munisipiu Dili, Tomas Barros hatete, iha munisipiu Dili rejistu moras HIV/SIDA aas tebes, no turi dadus ne'ebé rejistu hahú husi tinan 2023 to’o tinan 2024 hamutuk ema na’in 679 maka hetan moras HIV/SIDA.
Tanba ne’e, husu ba jovem sira atu hakbesik aan ba sentru saúde hodi halo tratamentu hodi prevene aan husi virus HIV/SIDA.
Nune’e, husu ba Institutu Nasional Kombate HIV/SIDA atu halo sosializasaun kona-bá virus HIV/SIDA to'o iha suku no aldeia, hodi eleva kuiñesimentu komunidade sira nian kona ba moras refere.
“Sosializasuan ne’e halo uluk iha Dili, depois mak ba to'o iha munisipiu, se bele karik husu ba Prezidente atu tun ba to'o iha suku no aldeia, tanba dalaruma ita la espera moras sira bele afeita ba to'o iha ne'eba," katak Reperzentante PAM.
