Xefe Departamentu Investigasaun Kriminál Nasionál (DIKN) Superintendente Polísia João Belo dos Reis informa, iha operasaun buska apreensaun, indentifika pesoal Polísia ho diviza Ajente Xefe ho inisial FDS asegura hela bala musan 246 ho karegador lima iha nia hela fatin.
"Ohin ita halo operasaun, ezekuta mandadu buska domisiliariu no prende sasan iha rezidensia Komisariu Konsellu Kombatentes Libertasaun Nasionál (CCLN) ho inisial FDS, maibé ita konsege identifika mós bala musan 246 ho karegador lima ita prende, tanba nia hanesan pesoál Polísia ida asegura sasán sira la iha ordem ruma husi insituisaun PNTL rasik,” dehan João ba jornálista sira iha edifisiu Komandu PNTL Munisípiu Kovalima, kuarta ne’e (19/02/25).
Nia informa, evidensia kona-ba bala musan ho karegador lima ne'e, parte investigasaun sei aprezenta ba komandu jerál PNTL.
“Sidadaun FDS ne'e hanesan mós membru PNTL ativu iha eskuadra Polísia Suai, maibé iha tinan 2015 lisensa sem salariu, tanba asumi hela kargu Komisariu CCLN Munisípiu Kovalima, depois rai hela monisoes bala musan ho karegador lima iha nia rezidensia, signifika nia halo violensia ba regras internal ami nian no liga ba lei krime, tanba ne’e buat rua ne’e sei submete hotu ba regulamentu disipliñar no krime nian, sei submete ba Ministeriu Públiku,” informa nia.
Tanba ne'e, Xefe Departamentu Investigasaun Kriminál Nasionál, hatutan, iha prosesu buska domisiliariu no apreensaun sasán ne'e, indentifika bala musan ho karegador ne'e iha ligasaun ho insituisaun PNTL nian, tanba buat hotu sei aprezenta ba komandu jerál PNTL hodi hein prosesu tuir mai.
"Tuir regras ne’ebé mak ami iha lisensa sem vensimentu to'o tinan tolu, depois halo renova, no nia renova ikus iha 2018 sae mai até agora seidauk iha fali renovasaun. Ida ne'e hotu sei haree atu prosesu tuir lei disiplinar PNTL nian," afirma nia.
Ho nune’e, DIKN rejista ona evidensia sira ne’ebé iha no sei aprezenta relatóriu ba iha Komando Jeral PNTL, hodi kontinua prosesu ne’e ba Ministeriu Públiku, bainhira iha ligasaun ho krime.
"Sasán evidensia sira, ami relata hotu ona ba Komandu Jerál PNTL saida mak ami atu halo no evidensia ne’ebé ohin ita rekolla iha FDS nia rezidensia," hakotu nia.
