Alkatiri hato’o hanoin ne’e hafoin ezerse nia diretu votus iha eleisaun ba orgaun suku iha suku Motael, Postu Administrativu Vera Kruz, Munisípiu Dili.

"Ha'u nia mensajen ba delgadu-delegada no Xefe Suku, kuandu atu sai xefe suku, ba suku tomak, labele hili partidu, labele hili, xefe ba ema hotu iha suku, ne'e mak ita ba xefe suku ne'e," dehan Alkatiri iha sede Suku Motael, Sabadu (28/10).

Tuir nia, eleisaun ba lideransa suku hanesan kompetisaun ida, no konfiansa ne'e sei mai husi komunidade.

Atu sai lideransa ba suku no aldeia, Alkatiri hatutan, tenke hatene lidera ema hotu no hatene organiza suku atu kontribui ba dezenvolvimentu suku nian.

“Ida ne'e mak povu presiza,” nia dehan.

Iha fatin ketak, Prezidente Repúblika, José Ramos Horta, iha esperansa boot atu maiória feto eleitu sai Xefe Suku.

Nia dehan, Xefe Suku ne'ebé iha agora daudauk kuaze 90% mane. Ida ne'e la signifika katak mane la di'ak, maibé tuir PR Horta, presiza halo balansu jenéru no fó fiar mós ba feto atu bele lidera. 

"Se feto barak mak eleitu ha’u kontente loos, ne'e hatudu Timor-oan sira nia maturidade," dehan Horta iha sentru votasaun Eskola Primária Filial Metiaut, Aldeia 17 de Abril, Suku Metiaut, Postu Administrativu Kristo Rei, Munísipiu Dili, Sabadu (28/10).

Iha oportunidade ne’e, PR Horta sujere mós ba Governu atu bele ajuda hadi’a Xefe Suku sira-nia uma, hadi'a mós Sede Suku no halo Sentru Komunitáriu ida iha kada Aldeia.

Molok ne'e, iha 16 Outubru 2023, tuir dadus husi Ofisial Supervizaun Eleitorál (OSE) husi Komisaun Nasionál Eleisaun (CNE) ne’ebé destaka ba suku sira iha Timor-Leste, kandidatu Xefe Suku iha Timor-Leste tomak hamutuk na’in 2.117, kompostu husi mane na’in 1.876 ka 88,62% no feto na’in 241 ka 11,38%.