Tuir Sekretaria Estadu Igualidade no Inkluzasaun, Maria do Rosario de Fatima, hatete, SEII no CARE iha komprimisiu atu kolabora iha inisiativa xave sira hanesan, fó kapasitasaun ba feto, halo mós advokásia hodi halo estratéjia Abordajen Integrada Jéneru iha Politika, Planu, no Orsamentu.
Nune’e mós, oinsa atu redus violénsia hasoru feto no labarik feto ho maluk portadora difisiensia sira no komunidade LGBTQ no mós oinsa atu reforsa partisipasaun feto iha vida ekonomia
“Asina nota entendimentu ne’e hanesan parte ida tau servisu hamutuk oinsa fó formasaun no kapasita feto sira iha área rural atu sira bele brani kandidata sira nia an liliu iha eleisaun hanesan Xefi Suku sira,”dehan nia Salaun Maria Goreti SEII, segunda ne’e (06/02).
Iha fatin hanesan, Diretór CITL, Peter Goodfellow hatete, Memorandum Entendimentu ida ne'e hametin CARE nia kolaborasaun ho SEll no iha objetivu atu foka liu tan ba prioridade sira hanesan, ba feto nia emporadementu ekonómia, feto nia partisipasaun iha foti desizaun, no prevensaun violensia bazeia ba jeneru iha setor hotu iha Timor-Leste.
“CARE no SEIl fahe vizaun hanesan konabá sosiedade ida ne'ebé igual no justu, no ida ne'e hanesan onra ida atu formaliza ami nia komprimisiu atu servisu hamutuk atu atinje vizaun ida ne'e. Hamutuk, ami sei luta hodi hetan oportunidade atu feto sira bele lidera no partisipa iha nivel hotu iha sosiedade atu inspira feto no labarik feto sira seluk atu atinje sira nia potensial tomak atu sai na'in ba foti desizaun iha futuru," nia esplika.
Diretór ne’e haktuir, CARE servisu ho komunidade sira iha area rural no hamutuk ho parseiru sosiedade sivil sira atu luta hasoru dezigualdade, tanba ida ne'e hatudu ona katak dalan efetivu ida atu kria impaktu ba dezenvolvimentu ne'ebé sustentavel.
Atu asegura moris di'ak no rona feto no labarik feto sira nia lian iha area rural no dezvantajen sai nudar sentru ba CARE nia servisu.
"lda ne'e atinje liu husi área prioridade haat hanesan Edukasaun, Hakbiit Feto sira-nia Ekonómia, Saúde no promove Feto sira-nia Lian iha sosiedade liu husi programa dezenvolvimentu no umanitariu sira" nia haktuir.
Entretantu, parseria ida ne'e sei validu ba tinan tolu, no ida ne'e bazeia ba komprimisiu komún atu avansa igualdade jéneru.
