Sekretaria Estadu Igualidade no Inkluzaun, Maria do Rosario Fatíma Correia hateten, iha tinan 2010 iha kedas dekretu nu. 7/2010 Lei Kontra Violensia Domestika (LKVD) ne'ebé harmonia ho Kodigu Penal (KP) mai ho natureza krime públiku hodi vítima sira denunsia kazu ba Ministeriu Publiku (MP).
Nia dehan, kada tinan hare kazu violensia domestika no insestu vitima balun iha ona konsiensia hato'o kazu ba tribunal, maibé balun seidauk.
Nune’e, SEII sei kontinua halo sosializasaun atu vitima sira bele iha konsiensia hato'o sira nia kazu ba tribunal. Maibe hare mós ba kazu insestu ne'ebé autor sira halo violensia balun kontinua livre, tanba vitima sira relata kazu ba iha tribunal ladun hetan Justisa lolos.
Ho razaun iha kodigu penal laiha artigu espesifiku, tanba tuir Kodigu Penal vitima Feto idade (14) ne'e eziste ona konsentimentu, tanba ne'e la priense elementu krime ba kazu ne'e.
Ho nune'e, nia dehan, hare ba kazu insestu, SEII forma ona ekipa ida kompostu husi Ministeriu Justisa (MJ), JSMP, Alfela no seluk, hodi halo revizaun ba lei kontra violensia domestika ne'ebé harmonia ho kodigu penal ho artigu espesifiku ida hodi kriminaliza autor kazu insestu.
Nia hatutan, SEII ne'ebé tutela ba iha Primeiru Ministru (PM) Taur Matan Ruak, entaun haruka ona proposta ba PM no nia konkorda atu halo revizaun ba LKVD iha Kodigu Penal hare kazu insestu nian.
"Foin lalais ami mós ba ona PN hasoru komisaun A atu bele konsidera katak, ami la mai ho proposta, entaun ami bele husu fali sira (komisaun A) katak bele halo ba anti projeitu, entaun ami espera deputadu sira konsidera projeitu ne'e atu sira bele halo revizaun ba LKVD harmonia ho Kodigo Penal hodi tau artigu ida, atu kriminaliza autor sira," dehan nia iha salaun Maria Goreti SEII, Kaikoli, segunda (06/02).
Governante ne'e esplika, iha Lei LKVD ne'ebé harmonia ho Kodigu Penal, tanba iha artigu balun mensiona iha Kodigu Penal, maibé la preve iha LKVD, nune’e labele kriminaliza autor kazu insestu sira.
"Hare kazu ne'e buras nafatin, tanba kazu ne'e akontese ba labarik menor idade, to'o iha tribunal dalaruma tribunal fó pena ba autor sira todan, maibé ba feto idade aldultu (14) ba leten kazu to'o iha tribunal sira dehan ne'e eziste ona konsentimentu hakarak ho hakarak, entaun autor sira nafatin livre laiha lei ida kriminaliza," nia relata.
Entretantu, molok ne’e, iha loron 13 fulan-Janeiru 2023, Fokupers hamutuk ho parseria sira halo ona Lansamentu ba Relatóriu Peskiza Implementasaun LKVD ba tinan 12 nian.
