Tuir Sekretaria Estadu ba Igualidade no Inkluzaun (SEII), Maria José Fonseca katak, maske dezenvolvimentu feto iha Timor-Leste lao neneik, maibé hahú hatudu ona mudansa boot ba partisipasaun feto iha vida sosial, ekonomia no polítika.

Partisipasaun feto iha vida polítika hahú ona asesu no realmente hatudu ho fakto pursentu 40 ba feto ne'ebé dadauk ne'e tuir iha Parlamentu Nasionál.

"Iha Lejislatura ida agora persentajen ne'ebé  ita atinji too 40% feto sira ne'ebe tur iha Parlamentu Nasionál, iha fatin seluk maka ita kontinua nafatin iha progresu maibé ladún makas maibé ita iha mudansa barak,"dehan nia bá Online INDEPENDENTE, iha Palásiu Governu Ohin.

Nia dehan, VIII Governu lidera husi Primeiru Ministru Taur Matan Ruak halo ona progresu barak, hodi establese ona sentru empoderamentu ba igualdade no inkluzaun sosial iha Munisípiu sira.

Feto mós iha oportunidade barak hanesan mane. Hanesan Timor-oan automatikamente sira mós hetan oportunidade hanesan mós ho Timor-oan seluk atu bele partisipa iha atividade sira.

"Bá buka osan, halo investimentu, bele sai mai ba negósiu, bele sai nain ba rai, oan feto sira bele ba eskola, sira mos bele ba serbisu iha li'ur hanesan mos, sira bele kandidatu an ba xefe suku, xefe aldeia no kargu públiku sira, sai pilotu buat oioin de'it," esplika nia

Feto Timor-oan mós lori Aviaun, lideransa institutu jestaun ekipamentus, komandante PNTL  feto iha na’in rua ka tolu tia ona, feto ba involve misaun dame iha rai seluk, feto reprezenta Timor-Leste iha nasaun seluk.

Alende ne'e, Governante ne'e haklaken katak iha kompromisu lubuk, iha konvensaun internasionál ba deskriminasaun oioin hasoru feto.