Seremónia Termu Aseitasaun no Pose ba Funsionáriu permanente na’in 17 ne’e hala’o hafoin rekrutamentu ne’ebé SEII hamutuk ho Komisaun Funsaun Públiku halo bazeia ba nesesidade instituisaun SEII nian liuhusi Komisaun Funsaun Públiku tuir forma Dekretu-Lei Nú. 34/2008, loron 27 fulan Agostu. Ho redasaun husi Dekretu-Lei Nú. 22/2011, loron 8 fulan Juñu kona-ba Rejime Konkursu Rekrutamentu, Selesaun, Nomeasaun no Promosaun Pesoál iha Administrasaun Públiku ne’ebé fó biban ba prosedimentu sira atu loke konkursu públiku, no proposta ne’e hetan autorizsaun husi Primeiru-Ministru.

Sekretaria Estadu Igualidade no inkluzaun, Maria do Rosario Fátima Correia, husu ba funsionariu sira ne'ebé simu ona posse atu hamutuk ho SEII hodi reforsa liu tan asuntu igualidade no inkluzaun iha Timor-Leste.

"Mai ita hotu kabe ita nia responsabilidade la’ós sekretaria estadu deit, maibé ba sira ne'ebé simu ona posse husu ita hotu atu reforsa liu tan iha asuntu igualidade no inkluzaun iha ita nia rain,”dehan nia iha Salaun Maria Goreti SEII, Kaikoli, sesta ne’e (06/01).

Nia hatutan, ba konkista sira ne'ebé simu ona posse laos atu tur de'it maibé tenki uza estratejia oioin hodi kombate violensia ne'ebé nafatin  buras iha rai Timor.

Nune'e mós Sekretaria husu ba funsionariu foun sira atu hatoman an disiplina iha tempu no oras servisu.

Governante ne’e mós husu atu funsionárius foun hirak-ne’e iha responsabilidade atu asegura povu sira ne’ebé mak sei vulnerável liu hanesan feto, labarik, maluk portadóra defisiénsia sira, ferik katuas, membru LGBTQI sira, atu sira mós iha direitu no oportunidade hanesan hodi asesu ba atendimentu públiku sira, lahó diskriminasaun, livre husi violénsia, iha kbiit sosio-ekonómiku hodi partisipa ativu iha sosiedade, iha pozisaun sira foti-desizaun tantu iha nível nasionál no lokál.

“Hanesan servidór no servidora Estadu no Povu nian buka atu tau aas povu nia direitu. Servi ho laran no fuan ho integridade forte atu nune’e nasaun Timor-Leste nia emar sira hotu bele sente no goza duni sira-nia direitu umanu ho dignu iha tempu ukun raik-an ida-ne’e. Tamba ne’e husu ba imi hotu haka’as an no esforsu bele tuir SEII nia knaar no responsabilidade hodi kontribui ba dezenvolvimentu Timor-Leste ne’ebé equitável no inkluzivu”, Governante ne’e haktuir.

Iha sorin seluk, Komisária Funsaun Públiku, Carmen Monteiro ne’ebé reprezenta Prezidente Komisaun Funsaun Públiku, Faustino Cardoso hato’o Parabéns ba empossadu no empossada na’in 17 ne’ebé hakat ona ho prosesu naruuk ida liuhusi selesaun ho méritu hodi sertifika ida-idak nia méritu ba funsaun sira ne’ebé sira aplika.

Nune’e mós ba sira-nia família ne’ebé fó apoiu ba empossadu no empossada sira hodi hakat ba iha susesu.

Komisária ne’e hatutan, bebeik sempre rona katak iha alegasaun sira ba funsionamentu públiku iha área efisiénsia no integridade funsionáriu públiku nian no ida ne’e rekoñese katak presiza duni hadi’a no hametin prestasaun servisu no iha balun ne’ebé tenke hasoru duni medida dixiplinár sira haktuir regras no regulamentu sira ne’ebé vigor.

Komisaária ne’e mós haktuir katak funsionáriu públiku sai hanesan parte integrál husi sistema Estadu Timor-Leste ne’ebé lori nasaun no povu ba iha moris di’ak.

Tanba ne’e, Komisária ne’e husu ba empossante sira atu hala’o knaar didi’ak iha SEII ne’ebé kaer mandatu importante tebes hodi asegura igualdade no inkluzaun atu ema ida-idak iha oportunidade hanesan atu foti vantajen tomak husi sira-nia moris no talentu, sein haree ba sira-nia rasa, jéneru, estatutu sosiál no seluseluk tan.

“Ba jestaun nasaun Timor-Leste ita tenke rekoñese katak funsionáriu públiku mak parte integrál husi sistema Estadu Timor-Leste ne’ebé lori Timor-Leste ba mehi sai nasaun ho rendimentu média altu ho povu moris ho vida dignu iha tinan 2030”, dehan Carmen.

Entretantu, funsionariu permanente na’in 17 ho kategoria sira hanesan Grau C na’in 2, Grau D na’in 9, Grau E na’in 5 no Grau F na’in 1.