Objetivu husi programa apoiu aihan ne’e atu oinsá bele redús númeru mal nutrisaun iha Timor-Leste.

Tuir Vise-Ministra MSSI, Signi Verdial hateten, programa ida ne’e hanesan programa komplementar ba programa Bolsa da Mãe Jerasaun Foun (BdM-JF), ne’ebé distribui ba Munisípiu neen (6) ne’ebé seidauk kobre ou implementa programa BdM-JF mak hanesan Munisípiu Ermera, Díli, Covalima, Manufahi, Manatuto no Baucau.

“Programa ida ne’e ho objetivu atu rezolve problema mal nutrisaun iha Timor-Leste, liu-liu atu halo investimentu ba dezenvolvimentu kapital humanu,” dehan nia ba Jornalista sira iha Suku Wenunuc, Postu Administrativu Metinaro, kinta horseik (05/01).

Nia hatutan, programa ida ne’e realiza, tanba Governu Japaun, liu husi World Food Programme-WFP fó apoiu aihan hanesan foos, koto no mina ba Governu Timor-Leste, liu husi Ministériu Solidariedade Sosiál no Inkluzaun hodi implementa.

Kompozisaun ba aihan ne’e mak hanesan, foos fortifikadu ho totál 1594 toneladas, koto 213 toneladas, mina 106 toneladas.

“Aihan hirak ne’e MSSI distribui ona ba ema vulneravel sira, liu-liu inan isin rua, inan fó susu inklui labarik sira iha Timor-Leste, husi Munisípiu Ermera, Díli, Kovalima, Manufahi, Manatuto no Baukau durante periodu fulan tolu. Benefisiárius iha Suku Wenunuc rasik hamutuk 153 Benefisiárius, kompostu husi inan isin rua no inan fó susu,”tenik nia.

Entretantu, Xefe Suku Wenunuc, Simeão Mendonça hateten, programa ida ne’e fó benefisiu di’ak ba komunidade sira, liu-liu ba inan isin rua, inan fó susu no labarik.

Tan ne’e, nia agradese ba Governu Japaun, WFP no MSSI, tanba bele realiza programa ida ne’e ba komunidade sira ne’ebé vulneravel.