Nia dehan, ba lista reklamante, dadaun ne'e sira prepara ona, no hein semana oin (segunda) submete ba Governu hodi hein desizaun.
“Relatoriu ami prepara ona, hein segunda semana oin ami submete ona ba Governu,”dehan nia ba Online INDEPENDENTE, iha Knar fatin Vila Verde, kinta ne’e (05/01).
Nia hatutan, tuir dadus, total benifisiariu ba subsidiu fim do ano husi Suku Vila Verde hamutuk na’in 3.419 ho orsamentu ne’ebé selu ba benifisiariu sira hamutuk dolar amerikanu $ 683.800,00
Husi dadus ne'e, iha uma-kain 2,899 mak hetan ona sira nia direitu ho montante osan hamutuk $579,800,00.
Ho nune’e, husi númeru ne’e iha reklamante na’in 520 mak seidauk hetan sira nia direitu.
Enkuantu, tuir dadus ne'ebé iha, uma-kain ne'ebé sai reklamante iha Suku Vila-Verdi mai husi Aldeia 1 de Setembru hamutuk na’in 143, Gideon na’in 62, Lemorai na’in 42, Mate Moris na’in 27, Mate Restu na’in 15, Matua na’in 63, Nopen na’in 33, Terus Nain iha na’in 87 no Virgolaza iha na’in 57.
Molok ne'e, Diretór Jerál Administrasaun Finansas MSSI Rui Manuel Expostu hateten, pagamentu subsidiu $200 la'o nafatin no halo ona pagamentu ba uma-kain iha teritorio laran tomak hamutuk 303.416 ne'ebé atinji ona pursentu 89.
Ba reklamasaun, Diretór Rui dehan, to’o agora MSSI seidauk simu lista reklamasaun husi Xefe Suku sira, maibé bainhira iha reklamasaun, mekanismu mak, sei haruka fali lista reklamante sira ba Ministeriu Administrasaun Estatal (MAE) hodi haree.
