Ezekusaun reál Orsamentu Jerál Estadu retifikativu 2022 ba todu Governu emtermos nominál to’o iha sábadu, 31 Dezembru 2022, atinji billaun $1,74 husi totál OJE retifikativu bilaun $2.2.
"Valór nominál billaun $1,74 ne’e mak aas liu iha istória Timor-Leste desde país ne’e restaura ninia Independénsia iha tinan 2002 no konsege ultrapassa ezekusaun reál iha tinan 2016 iha ne’ebé Governu konsege ezekuta billaun $1,63," haktuir husi komunikadu imprensa ne'ebé Jornalista Independente asesu husi Gabinete Media Ministeriu Finansas, (04/01).
Tuir komunikadu, iha tinan 2017, 2018 no 2020, Timor-Leste hasoru kresimentu ekonómiku negativu kauza husi impasse polítiku ne’ebé naruk, pandemia Covid-19 no efeitu mudansa klimátika ne’ebé halo konke ekonomia monu ba negativu 8,3% iha 2020.
Enkuantu, iha tinan 2021, ekonomia Timor-Leste konsege krese ho kresimentu pozitivu 2,9%. Kresimentu pozitivu akontese tanbá Oitavu Governu Konstitusionál trasa medidas importante sira hanesan: Apoiu ba Empregu; Moratoria de Krédito; Izensaun Propinas ba Estudantes Ensinu Superiór; Subsídiu Internet ba Estudantes Ensinu Superiór; Sosa Produtu Alimentár husi Produtór Lokál; Finansiamentu operasaun Sentru Integradu Jestaun Krize; Pagamentu traballadór liña frente; inklui Pagamentu sesta básika.
Nune'e medidas hirak ne’e Governu trasa ho objetivu atu bele hakmaan situasaun sosiál no ekonomia empreza, traballadór, família sira no buka atu rekupera ekonomia.
Entretantu, durante tinan rua ikus, ritmu ezekusaun OJE mós la’o di’ak ona tanbá iha Estabilidade Polítika no Estabilidade Governativa ne’ebé fó biban ba aprovasaun Lei Enkuadramentu Orsamentu Jerál Estadu no Jestaun Finanseira Públikas no Dekretu Governu kona-ba ezekusaun OJE hodi fasilita ezekusaun OJE 2022 ne’e rasik.
Iha tinan 2021, Governu konsege ezekuta $1,44 billaun. Ida ne’e mak segundu mellór ezekusaun desde tinan 2016, maske Governu aplika restrisoens oin-oin ne'ebé limita sirkulasaun ema no sásan sira kauza husi pandemia Covid-19, Inundasaun no efeitu mudansa klimátika.
Ho ezekusaun reál OJE ne’ebé aas durante tinan rua ikus ne’e hatudu katak kapasidade ezekusaun orsamentál iha kada linas ministeriais mós aumenta sa’e.
Atu sustenta ritmu ezekusaun orsamentál ne’ebé aas ejize estabilidade polítika no estabilidade governativa inklui investimentu kontínua iha área rekursus umanu, iha sistema no enkuadramentu legais.
Bainhira iha Estabilidade Polítika no Estabilidade Governativa no ho ritmu ezekusaun orsamentál no kresimentu hanesan ne’e, maka ekonomia Timor-Leste sei bele rekupera totál iha tinan 2024 no país ne’e sei tama fila-fali ba iha trajetória kresimentu ekonómiku no dezenvolvimentu sosiál.
