"Na'in ba kazu krime ne'e mak Ministériu Públiku kona-ba prosesu investigasaun ne'e hanusa, Ministru Interiór responsabiliza nia membru sira mak halo aktu krime ne'e. Tanba PNTL iha Ministériu Interiór nia okos," dehan Hugo Lourenço iha Kampuz UNDIL, Mascarenhas, (04/01).

Nia haktuir, agora prosesu investigasaun ba Kazu ne'e la'o hanusa, Ministériu Públiku mak tenke fó saida ona rezultadu investigasaun, tanba ema hotu hatene katak joven ne'e mate iha sela laran.

"Agora familia mak tenke ezije nafatin, se família mak nonok ita atu ko'alia saida, direitu boot liu mak matebian nia família,atu ezije nafatin nia prosesu to'o iha ne'ebé ona," nia haktuir.

Tuir nia, agora  la'ós kazu ida ne'e de'it, maibé kazu barak mak pendente iha Ministériu Públiku purezemplu ida mak kazu droga ne'ebé inisiu manas maibé to'o agora nonok ona.

Nia subliña, la'ós matebian nia inan de'it mak lamenta ba prosesu tomak, maibé hotu-hotu  lamenta ho akontesimentu, tanba joven ne'e mate iha sela polísia nian, maibé autór sira livre lala'o, tanba investigasaun la'o kuaze fulan hira nia laran, maibé to'o agora ema hotu hanoin se mak autór ba kazu ida-nee.

"Frakeza mak iha Ministériu Públiku, tanba ne'e Parlamentu Nasionál tenke husu PNTL no Ministériu Públiku kazu ne'e ninia prosesu ne'e hanusa. Nu'udar reprezentante povu hodi ko'alia justisa ninia lala'ok iha rai laran," Nia reforsa

Nia fundamenta, ema vítima tiha ona, maibé kontinua vítima nafatin, tanba justisa la di'ak ba sira, kazu ne'e kleur ona, maibé to'o agora familia seidauk hetan lialos.

Molok ne'e, Prezidente Komisaun B, José Agostinho Sequeira "Somotxo" hateten, kazu José Bernardo mate iha sela detensaun Komandu Polisia Nasionál Timor-Leste (PNTL) Munisípiu Dili ne'e kleur tiha.

"Ami la'ós Ministériu Públiku atu hato'o buat hotu. Informasaun jerál ka relatóriu jerál  ne'ebé Komandu Jerál hato'o mai komisaun B mak levantamentu, infromasaun, dadus hot-hotu hato'o ona ba Ministériu públiku," dehan nia, Via Telefone, Kinta (29/12).

Deputadu Somotxo dehan, tantu família no reprezentante povu iha komisaun B Parlmentu nasionál mós hein Ministériu Públiku fó sai rezultadu investigasaun kazu ne'e.

"Tanba dadus hotu-hotu husi Polísia Sientífiku Investigasaun Kriminál (PSIK) no Polísia Nasionál Servisu Investigasaun Kriminál (PNSIK) servisu hamutuk hato'o hotu ona ba Ministériu públiku," tenik nia.

Nia reforsa, tanba  ne'e momentu família husi matebian ni'an ba iha Parlamentu Nasionál atu hasoru komisaun B hodi husu  prosesu investigasaun no rezultadu investigasaun ne'ebé mak la'o tiha ona, maibé iha tempu debate Orsamentu Jerál Estadu tinan fiskál 2023, entaun Komisaun B laiha duni tempu atu hasoru sira.

"Tanba ne'e mak husik hela dokumentusaun sira, hanesan sira-nia evidensia atu Ministériu Públiku atu hala'o lalais kona-ba joven ne'ebé mak mate iha sela Komandu Dili," Nia fundamenta.

Molok ne'e, Inan matebian José Bernardo “Adriano”, ne'ebé mate ho kondisaun tali iha kakorok, iha sela detensaun Komandu PNTL Dili, tanis iha Parlamentu Nasionál bainhira atu hasoru komisaun B trata asuntu seguransa no defeza, maibé Deputadu sira laiha fatin.

Matebian José Bernardo nia Inan, Regina de Jesus hatete, mai Parlamentu Nasionál hodi husu prosesu no rezultadu investigasaun ne'ebé la'o kuaze atu fulan-tolu ona.

"Ha'u nia oan tama sela oras 4 balun de'it mate kedas ne'e, o ba nia lian laiha tiha ona ne'e.maibe kuitadu liu boot sira, boot ho boot sira, o ba  ida-ne'e hein lai, o ba ida-ne'e ba hein lai, prosesu sei la'o," dehan Metabian José Bernardo nia inan,  Regina de Jesus ho mata-ween, iha Parlamentu Nasionál, Kuarta (30/11).

Nia dehan, objetivu mai Parlamentu Nasionál atu husu prosesu investigasaun ba nia oan nia mate, tanba atu tama ona fulan-tolu, maibé família seidauk hatene lolos motivu saida.

"Prosesu ida-ne'e to'o agora lala'o ne'e, ha'u husu mak ida-ne'e de'it, ha'u la husu barak de'it, husu ida-ne'e de'it," katak nia.

"Ha'u husu prosesu ne'e to'o iha ne'ebé, aban fulan tolu ona prosesu ne'e la'o to'o iha ne'ebé ona, primeiru ha'u husu prosesu la'o tiha ona to'o nia rohan ida-ne'e, maibé ida-ne'e la'e, o ba ida-ne'e, prosesu la'o ona ba oin to'o agora hau rona buat ida," Nia reforsa.