Enkuantu, iha loron 03 fulan-Janeiru 2023 rezulta mós sala tolu iha eskola EBC no Pre-eskolar iha Mertutu, Munisipiu Ermera.
Tuir Diterór DNASEAS iha MEJD, Joaquim Martins hatete, iha Munisipiu Vikeke eskola ne’ebé hetan estragus husi anin boot mak hanesan, EBF Nahae iha Postu Adminitrativu Uatulari no mós EBF Sahadaba iha Ossu.
Aleinde, akontese mós iha EBC Tapo iha Munisipiu Bobonaro, EBF Buanamor Kotamutu iha Luro Munisipiu Lautem no mós Pre-eskolar ida iha munisipiu Aileu, Postu Administrativu Lekidoe.
Nia dehan, EBF 04 Montanhas no sala ida ba profesores sira nian iha Ainaro mós hetan estragus.
“Ida ne’e mak akontesementu dezastre naturais ne’ebé akontese iha loron hirak liu ba, haree ba situasaun ida ne’e, ami hetan ona orientasaun husi Exelensia Ministru Edukasaun Juventude no Desportu no iha tempu badak sei forma ekipa ida urjenti hodi halo monitorizasaun ba eskola sira ne’ebé kauza husi dezastre naturais,” dehan nia ba Online INDEPENDENTE via telephone, kuarta ne’e (04/01).
Nia hatutan, tuir planu, iha tempu besik ekipa husi MEJD sei tun ba terenu hodi halo monitorizasaun ba eskola sira ne’ebé afeitadu.
Husi rezultadu monitorizasaun ne’e mak ministeriu sei haree fali posivelmente hodi apoiu eskola sira ne’ebé afeitadu, atu nune’e garante nafatin prosesu aprendizajen ho diak ba eskola sira.
Entretantu, nia dehan, iha Kapital Dili, laiha eskola ida mak afeita husi anin boot.
“Neste momentu, ami seidauk iha informasaun ida ba Munisipiu Dili. Munisipiu Dili só iha ne’e, sentru impresaun, maibé eskola sira laiha afeitadu kauza ruma”.
