Diretór Jerál Administrasaun Finansas iha MSSI Rui Manuel Expostu hateten, pagamentu subsidiu $200 la'o nafatin no halo ona pagamentu ba uma-kain iha teritorio laran tomak hamutuk 303.416 ne'ebé atinji ona pursentu 89.
“Pagamentu ba subsidiu $200 sei kontinua la'o hela, to'o hodikalan 12:00 Otl, dadus ne'ebé ha’u hetan, ita halo halo ona pagamentu ba uma-kain 303.416 ho total orsamentu hamutuk $60.683.200," dehan nia ba Online INDEPENDENTE, iha knar fatin Kaikoli, kuarta ne’e (04/01).
Diretór ne’e hatutan, pagamentu kuaze iha munisipiu hotu finaliza ona no hela de'it Munisipiu Dili no Rejiaun Administrativu Espesial Oekusi Ambeno (RAEOA).
Nia haktuir, pagamentu iha Dili, hela deit Suku Komoro aldeia rua mak mak seidauk hotu.
Aleinde, iha RAEOA, hela Suku Costa ho Abana mak seidauk hotu.
“Informasan ne'ebé ha'u hetan, posibilidade RAEOA pagamentu sei remata iha sesta semana ne'e,”tenik nia.
Entretantu, tuir dadus, total benifisiariu ba subsidiu fim do ano, ne'ebé MSSI rejista hamutuk 339.954 uma-kain, husi Munisipiu 13 inklui RAEOA ho nia orsamentu hamutuk dolar amerikanu $67.990.800.
Ba reklamasaun, Diretór Rui dehan, to’o agora MSSI seidauk simu lista reklamasaun husi Xefe Suku sira, maibé bainhira iha reklamasaun, mekanismu mak, sei haruka fali lista reklamante sira ba Ministeriu Administrasaun Estatal (MAE) hodi haree.
