Sekretaria Estadu Igualdade, Elvina Sousa Carvalho hatete, formasaun ne’e fó ba xefe suku eleitu sira atu had’ia sira-nia mentalidade iha futuru mai.
“Ne’e nu’udar komitmentu husi Sekretaria Estadu Igualdade desde inisiu tanba durante kampanha ba eleisaun ne’e ami nafatin iha komitmentu atu apoiu feto sira, maluk feto sira atu hakat ba oin bele brani kandidata an hodi hetan konfiansa husi povu,” dehan Sekretaria iha Salaun Tower Fatuhada, Kinta (20/07).
Governante ne’e dehan, servisu lubuk ida SEI halo ona hodi fasilita feto sira liu husi formasaun ne’ebé mai husi Organizasaun Naun Governamental (ONG) iha área oioin.
Maske xefe sira eleitu ona, maibé, SEI nafatin akompanha iha sira-nia lideransa atu sai lideransa ne’ebé inkluzivu hodi promove jéneru no dezenvolvimentu lokál iha sira-nia suku laran.
Diretór Nasionál Dezenvolvimentu Lokál, Elvino Bonaparte do Rego hatete, programa ne’e atu perpara feto ba futuru liliu lidernsa sira liga ba asuntu feto nian.
Tanba husi restaurasaun independénsia Organizasaun Naun Governamental barak mak servisu ba feto, maibé tinan hirak ikus ne’e, kandidata lideransa feto ba suku no aldeia menus nafatin.
“Ita hamutuk hodi halo preparasaun ba futuru ba lideransa sira liliu liga ba feto sira tanba ita haree katak hahú husi ita-nia restaurasaun independénsia NGO barak servisu ba feto maibé realidade ita haree katak tinan hira tutuir malu mai to’o ohin loron husi xefe suku no aldeia sira ita haree dadus sa’e tun,” dehan Diretór Nasional.
Xefe Suku Manu Tasi, Postu Administrativu Ainaro Vila, Munisípiu Ainaru, Manuela da Silva Caldas hatete, bainhira tuir formasaun ne’e remata, nia parte sei fahe fila-fali esperiénsia ne’ebé nia hetan, ba iha feto maluk sira.
Nune’e, ba futuru sira bele hatene ona kona-ba saida mak lideransa.
“Durante loron rua hahú ho aban karik ami hetan formasaun lideransa sei la husi iha ami de’it sei habelar tutan, ba ami nia komunidade no feto maluk atu nune’e iha futuru kolega sira ne’ebé hetan formasaun hanesan ne’e sira bele hatene hela ona,” katak xefe suku
Enkuantu, formasaun ne’e sei realiza durante loron rua, hahú husi loron 20 to’o 21 fulan Juñu tinan ne’e, no formadór ba formasaun ne’e mai husi Sekretaria Estadu Igualdade No Ministériu Administrasaun Estatál (MAE).